Rene Olsen sungiusaallammattut toqqagaavoq

Arsaannermi angutini pissartat B-67imeersut sungiusaasuat Rene Olsen isumaqarpoq siulersuisut sungiusaasooqatinilu sungiusaallammattut toqqagaanermini ataqqinaammik piginneqataasut.
Allattoq Noah Mølgaard
decembarip 30-at 2010 10:08

Ukioq 2010-mi sungiusaallammattut toqqarneqarpoq Rene Olsen B-67-imeersoq.

Toqqaasuuvoq timersoqatigiit kattuffiat GIF allaffimminni sisamanngorneq decemberip 30-iat ataatsimuualaartitsinermi sungiusaallammammik siulersuillammammillu toqqakkanik saqqummiussisoq.

Rene Olsen ukiumi arsarfiusumi qaangiuttumi assut angusarissaarpoq B-67 arlaleriarluni pissartanngormat. Aammattaaq kalaallit inuusuttut angutit sungiusaasuuffigai Arctic Winter Games Albertami ingerlanneqarmat tassanilu sungiusagai pissartanngorput.

- Kisianni angusat tamakku kisimiilluni anguneqarsinnaanngillat. Tassani sungiusaasooqatikka aammalu klubbimi siulersuisut pissutaaqataalluinnarput angusarissaarnermut. Tassa inuppaalussuit suliniarnerat tunulequtaavoq angusarissaarnermut, taama Rene Olsen KNR-imut oqarpoq.

Toqqagaanerminut atatillugu checkimik 10.000 koruuninik aningaasartalimmik pissarsivoq tunniussisuuvorlu GIF-imi siulersuisuni ilaasortaq Frederik Lundblad.

Siulersuisuullammattut Kristian Heilmann GSS-imeersoq toqqarneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq