Rekortiliiniat qaqqap innermik aniatitsineranit akornuserneqarput

Timmisartorluni Nunarsuarmik sukkanerpaamik kaajallaalluni rekordiliiniarneq Islandimi qaqqap innermik anitsineranit unitsinneqarpoq.
Allattoq Mads Lynge
marsip 22-at 2010 10:28

Timmisartoq rekordiliiniarnissamut atorneqartoq Schweiziminngaanniit tallimanngormat ullaap tungaani qangattarpoq, kaajallaanialunnerullu akunnernik 57-inik sivisussuseqarnissaa naatsorsuutigineqarluni, atuagassiap Ingeniørenip nittartagaani tamanna atuarneqarsinnaavoq. Rekordiliisoqarnissaalu ilimagineqaleraluartoq Islandimi qaqqap innermik anitsinera ajoqutaalerpoq.

Timmisartup orsersorneqarnissaa pissutigalugu mittarfinnut assigiinngitsunut mittariaqartassaaq, orsersornerillu pilersaarutaasut siulliit arfineq-pingasut ajunngeriarlutik qulingiluassaannik orsersornissaq ajutoorfiuvoq. Timmisartormi Montrealimiit Keflavikiliartillugu inuttai, ilisimatinneqarput Islandimi qaqqaq innermik anitsilersimasoq, mittarfillu matuneqartariaqalerluni.

Rekordiliiniartut Canadami Goose Bayimut, Inuktitut Vaalimik taaguutilimmut utiinnartariaqarsimapput, Irlandimilu Shannonimut ingerlaqqittariaqalerlutik. Tamanna rekordiliiniarnermik eqquivoq, Arnold Palmerillu 1976-imi rekordia suli atuuppoq.

Rekordiliiniat Palmerip rekordia 29 minutsiinnarnik inorpaat, agguaqatigiissillugulu akunnermut 647 kilometerinik ingerlaartarsimallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq