Region Hovedstademut ukiuni 15-ini akiliivallaarsimavugut
Taamaakkaluartoq Rigshospitalimi pisortat isumaqarput, napparsimasut immikkut ilisimasalinnik katsorsarneqartartut Nunatsinni Peqqinnissaqarfiup ikinaarlugit nalunaarusiarisimagaat.
Nunatsinnit Danmarkimut napparsimasut katsorsartikkiartortut tamarmik immikkut ilisimasalinnit suliarineqartussatut Region Hovedstadenimit ullumikkut nalilerneqartarput.
Rigshospitalimut Nunatsinnit 2010-mi suliaritikkiartortut 81 procentii immikkut ilisimasalinnik katsorsartinneqartussaasut Region Hovedstadenip nalilersimagaa Dronning Ingridip Napparsimmavissuani nakorsaanerup, Carsten Thordahlip nalilerpaa 36 procentit 50 procentillu akornanni taamaallaat immikkut ilisimasalinnik suliarineqartussaasimagaluartut.
Kisitsisit taakku takutippaat ukiumut aningaasat 15 million koruunit 20 million koruunillu akornanni Nunatta sipaarutigisarsimasinnaagaluaraat, Peqqinnissaqarfiup Qullersaqarfiata pisortaa, Kurt Nielsen oqarpoq.
Kisitsisit nikiganeri naapertorlugit, Dronning Ingridip Napparsimmavissuani nakorsaanerup aamma Peqqinnssaqarfiup Qullersaqarfiata kukkunersiuisartut Deloitte suliakkersimavaat misissueqqullugu, misissuinerullu nalunaarusiarineqarnera maanna naammasseqqammerpoq.
- Nalunaarusiami takuneqarsinnaavoq 15 million koruunit 20 million koruunillu akornanni ukiumut akiliivallaartarsimasugut, Peqqinnissaqarfiup Qullersaqarfiata pisortaa, Kurt Nielsen oqarpoq.
Region Hovedstadenimut isumaqatigiissut 1995-imili atorunnaarpoq, tamannalu pissutigalugu tunngaviusumik qanoq akiliisarnissaq iluamik ilisimaneqarsimanngilaq.
- Toqqorsivitsinni misissuininni takusinnaasakkat naapertorlugit isumaqatigiissut 1995-imili atuukkunnaarsimasoq atuarsinnaavara. Tassalu tunngaviusimik qanoq akiliisarnissarput taamanili takussutissaqanngilaq. Taamaallaalli ukiut tamaasa isumaqatigiissusiortoqartarsimavoq katsorsartikkiartortut qassit missaanniittut Rigshospitalimut suliaritikkiartortassanersut, allamik naamik, Kurt Nielsen oqarpoq.
Aningaasanik sipaarnissaq siunertaralugu maanna suliaritikkiartortunut akiliutaasartut Danmarkimi tamani naliginnaasumik atorneqartut atuutilersussaapput, tassalu DRG malillugu akiliutit, taanna akileeriaaseq Danmarkimi napparsimmaviit akornanni atorneqartarpoq.
- Ullumikkut akiliutigisartagarput tassaavoq immikkut ilisimasalinnit suliarineqartussanut akigitinneqartartoq. Maannali atulissavarput DRG malillugu akiliutigineqartartoq tassalu taanna Nunatsinnit suliaritikkiartortartut amerlanersaannut naleqquttoq, Peqqinnissaqarfiup Qullersaqarfiata pisortaa, Kurt Nielsen oqarpoq.
Aappaagumiit atuutilersumik DRG malillugu Nunarput akiliisalissasoq Region Hovedstadip akueraa.
Folketingimut ilaasortap, Sara Olsvigip (IA) nuannaarutigaa Peqqinnissaqarfiup ilisimalersimammagu akiliivallaartoqartartoq. Tamatumunnga ilutigitillugu Sara Olsvig Peqqissutsimut ministerimut apeqquteqarnermini oqaatigaa, akiliivallaartarsimaneq Danmarkip akisussaaffigisariaqaraa.
