Diskoline ilaasunik navianartorsiortitsisimanermut akiligassinneqartut

Imarsiornermi malittarisassat unioqqutillugit umiarsuup ingerlanerata atortorissaarutaata igalaasartaa aseroqqasoq novembarip qaammataani 2012-imi inunnik angallassisimanerminut umiarsuaatileqatigiiffik eqqartuussivimmit akiligassinneqarpoq. Nunatsinni Politiit tusagassiutinut allapput.

- Nunatsinni sila allanngoriataarsinnaavoq, ukiumi anorersuaq takkuteriasaartarpoq. Taamaammat nunamut ilisimasaqarneq kisiat peqqutigalugu aallartoqarsinnaanngilaq - pingaartumik ilaasunik akisussaaffeqartilluni. Tamanna eqqartuussiviup isumaqatigimmagu nuannaarutigaarput, Nunatsinni Politiit unnerluussisussaatitaasuat Adam Fischermann oqarpoq.

Umiarsuaatileqatigiiffiup umiarsuaamminik ajornartooqqanermini ilaasussatik Qeqertarsuarmiit Aasiaat aqqusaarlugu Ilulissanukartussat, allamut ilaatillugit Targamik ingerlanniarsimavaat. Ilaasut meerartaqartut quliupput. 

Sila taarsimmat angallat Aasiaat Ilulissallu akornanni malissiorluni nittaalartalimmillu anorersuartoq ingerlaqqinneq ajulerpoq. Angallatip naalagaata VHF-raadiu atorlugu sumiissusertik paasivaa umiarsuaatileqatigiiffillu ikaartaammik aggertitseqqullugu. Ilaasut tamarmik ajoratik Ilimanamut apuunneqarput.

Nunatta eqqartuussiviani suliap suliarineqannginnerani, Qaasuitsup eqqartuussiviani marloriarluni suliarineqarsimavoq, kukkuluttornerlu peqqutigalugu eqqartuussut nutaamik suliarineqarpoq. 

Suliap Nunatta eqqartuussisuuneqarfianut suliassanngorteqqinnissanerlugu umiarsuaatileqatigiiffik ullunik 14-inik periarfissaqarpoq.