Rasmussen: Kalaallit piumasaat aallartissutissapilussuuvoq

- Kalaallit Nunaata Danmarkillu piaartumik isumaqatigiissutigisariaqarpaat uuliamik qalluisoqalerpat aningaasat iluanaarutaalersussat qanoq agguaanneqassanersut. Maanna oqallisaasut asuli nalornisitsipput, allaallu nunarsuarmi uuliasioqatigiinnik siunissami suleqatissaasinnaasunik qimaatitsiinnassallutik, Roskildep ilisimatusarfiani ilisimatooq nunarpullu pillugu immikkut ilisimasalik, Rasmus Ole Rasmussen isumaqarpoq.

- Isumaqarluinnarpunga kalaallit qallunaallu aallulluarlugu isertitat qanoq agguarneqartarnissaat suliniutigalugu aallartittariaqaraat.

- Eqqarsaatigilluakkamik pilersaarusiorneq tassaasinnaavoq naalagaaffiup ataatsimoortumik tapiissutaasa milliartuaartinnissaat. Qallunaat Kalaallit Nunaata sineriaani nunami immamilu alapernaarsuisitaqarnerat, nakkutilliisuunerat allanillu suliaqarnerat, soorunami Danmarkimut ullumikkut aningaasartuutaavoq, taamaattumik qallunaat suliaat Kalaallit Nunaata qanoq akileeqataaffigisassaneraa siumungaaq aamma isumaqatigiissusiorfigisariaqarpoq.

Rasmus Ole Rasmussen aperigatsinni, isertitat tamakkiisut Kalaallit Nunaannut tuttassasumik oqaaserisat ulluni kingullerni saqqummiunneqartartut qanoq paasinerai, oqarpoq, nammineq oqaatsit taakku Kalaallit Nunaata Danmarkillu isumaqatigiinnialerneranni aallartissutissapilussuartut isigigini.

-Ajunngeqaaq, illuatungeriit naapeqatigiiffissamik ujarliinnartassapput. Soqutigisat assigiinngitsut saqqummiunneqaraangata taava oqallisigisassavaat. Pingaarnerpaavormi

kalaallit qallunaallu erseqqissumik inissillutik suleqatigiinnissaat, ataatsimoorussamik oqariartuuteqarneq aatsitassarsiornerit pillugit isumaqatigiinniarnissani pingaaruteqarluinnarmat. Rasmus Ole Rasmussen erseqqissaavoq, oqariartuut ataatsimoorussaanngikkaangat isumaqatigiinniarfittut sanngiitsutut isineqalernermik kinguneqarsinnaasartoq.