Rasmus Lyberth USA-lialerpoq
Eqqumiitsuliortut 750-it sinnillit, Danmarkimit, Filandimit, Norgemit, Sverigemit, Islandimit, Savalimmiunit, Ålandimit Kalaallit Nunaannillu pikialaartitsinermi peqataassapput. Isiginnaartitsineq, qitinneq, filmertitsineq, nipilersorneq, eqqumiitsuliat, atuagaateqarneq, ilusilersukkat, illuliortaaseq nunallu avannarliit nerisassioriaasiat sammineqarnissaat pilersaarutaavoq.
Rasmus Lyberth Kalaallait Nunaata kulturikkut aallartitaatut peqataassalluni kingumut toqqarneqarpoq, taassuma ålandimiu nipilersortartoq, Greta Sundstrøm, marloriarluni tusarnaartitseqatigissavaa.
Niplersoqatigiit Nanook aamma tusarnaartitsissapput, aamma eqqumiitsuliortoq taalliortorlu, Jessie Kleemann, suliaminik sutorniartarfeerannguami saqqummersitsillunilu taalliaminik atuaassaaq.
Assiliisartoq, Jørgen Chemnitz, assilisaminik saqqummersitsissaaq, siallu pissusiata Kalaallit Nunaannut inuinullu qanoq sunniuteqarnera oqaluttuarissallugu. Qallunaallu qaamanermik ilusilersuisartup, Jesper Kongshang-ip, illorsuaq Kennedy Center, arsarnerit qaamanerannik pikialaartitsineq tamaat qaammarsassavaa.
Danmarkimi Kultureqarnermut ministerip, Marianne Jelvedip, aamma nunat avannarliit suleqatigiinnerannut ministerip, Manu Sareenip, pikialaartitsineq, aqagu aallartittussaq, ammassavaat. Pikialaartitsineq John F. Kennedy Center for the performing Arts-imi pissaaq, taannalu tassa Nordic Coolimik taaguuteqartinneqasasaq.