Rasmus Lyberth tusarnaartitsisoq tv-kkut unnugu aallakaatinneqassaaq
DR K-mi unnugu nalunaaqutaq arfineq pingasunut aallakaatinneqassaaq "Menneskets Planet". Tassani takuneqarsinnaassaaq, nunarsuarmi tusarnaartitsisarfiit akimanersaanni London-imi Royal Albert Hall -imi tusarnaartitsineq.
Royal Albert Hall-imi kalaallini siullersaalluni tusarnaartitsisoq Rasmus Lyberth tusarnaarneqarlunilu isiginnaarneqarsinnaassaaq.
Tusarnaartitsineq siorna aasakkut immiunneqarpoq, nipilersortartut nunarsuarmi tamaneersut peqataaffigisaanni. Tusarnaartitsisunut ilaapput, tuluit TV-qarfiata BBC-ip nipilersortartui BBC Concert Orchestra, aamma nipilersortartut Zambia-meersut aammalu Mongolia-meersut tusarnaartitsillutik.
Tusarnaartitsinerup takutinneqarnerani assit nunani issittuni assilineqarsimasut takutinneqartassapput, taakkua TV-qarfiup BBC-ip aallakaatittassiaannit "Human Planet" -imit tigusaapput, taakkualu KNR TV-ikkut allakaatinneqarnikuupput.
Tusarnaartitsineq DR K-mi unnugu arfineq pingasunut aallakaatineqarpat, Rasmus Lyberth saniatigut nipilersoqatigisartagaa supputaasartartoq Christian Søegård erinarsortartorlu Jane Clark nipilersussapput, Royal Albert Hall-imi tusarnaartitsinermi inuit 6000-nit tusarnaariarneqarpoq.