Rasmus Lyberth eqqumiitsuliaminik saqqummersitsivoq
Kalaallit eqqumiitsulioriaasitoqai isumassarsiorfigisarpai eqqumiitsuliassamili ilusai suliarilikkamini namminneq saqqummertutut ittarnerarlugit.
- Soorlu ukkusissap nammineq takutittarpaa qanoq isikkoqarnissani, aamma nassunnik suliaqarneq assorujussuaq soqutigilernikuugakku, Rasmus Lyberth oqarpoq.
Rasmus Lyberth eqqumiitsuliaminik Danmarkimi aatsaat saqqummersitsivoq, kisianni meeraangallaramili assigiinngitsunik sanalunniartarsimavoq.
- Ukkusissanik sulisarneq inuusuttuarannguullungali soqutigilerpara, kisianni ukiut kingulliit pingasut ingerlanerani aatsaat nassunnik suliaqartalerpunga.
Imminut oqarfigiuartarnikuugama angusassat angugukkit eqqumiitsuliorneq suliarinerulissallugu, tassunga maannakkut ingerlaannguartsiarpunga. Kisianni erinarsortarnerma saniatigut eqqissiivillunga suliarisarnissaat naatsorsuutigivara.
Rasmus Lybertip saniatigut Thue Christiansenip eqqumiitsuliai, Lucia Geraaep tupilliai, Kristina Markussenip marriai aamma Linda Riberip qalipagai saqqummersinneqarput.
Gimsingshovedimi sapaatip-akunnerata naanerani aamma allanik pisoqassaaq, tassa kalaallit nipersugaannik erinarsugaannillu festivalertitsisoqassammat, Rasmus Lyberthilu tassani aamma peqataassaaq.
