Rasmus Lyberth Danish Music Awards Folk 2007-imut piukkussaavoq

Erinarsortartoq Rasmus Lyberth siullermeerluni ukioq manna Danish Music Awards Folk-eqalerpat nersornaasigassatut piukkunneqartunut ilaasussanngortinneqarsimavoq. Ukiup ingerlanerani Danmarkimi aliikkusersuillaqqinnerpaatut, erinarsullaqqinnerpaatut taalliullaqqinnerpaatullu piukkunneqassalluni.

Rasmus Lyberthip piukkunneqarnini tupaallaatigaa.

- Ippassaq aatsaat paasivara, nuusiortitsisutsinnut allarluinnarmik paasiniaallunga sianerama pilluaqqullarmanga aperalugu sooq? Taassuma oqaluttuummanga aatsaat paasivara, Rasmus Lyberth unnersiorpoq.

Taanna nuannaarnerarpoq, aatsaalligooq tusaramiuk iluamik suli isertinnagu oqarluni.

Rasmus Lyberthilu aatsaavissuaq Danish Music Awards Folk-imi marsip qulingani pisussami piukkussanut peqataatinneqassaaq.

- Sianerfiginikuuaannga ilisimatillunga nipilersortukkalu ulloq taanna nipilersussasugut, kisianni piukkussanut ilaatinneqassanerlunga nalugaluarpara. Nalunaqaarmi suli ajugaassanerlunga aamma ajugaanngikkaluarluniluunniit tamakku iluaqutaajuaannartarput, oqarpoq.

Rasmus Lybeth Maniitsup ukiuni 250-inngortorsiorneranut atatillugu februaarip pingajuanni aamma Maniitsuliassaaq.