Rasmus Lyberth 70-iliivoq Nuummilu tusarnaartitsissalluni: Tamanut qujarusuppunga
Nipilersortartoq misigissuseqarluartoq Nuummi Katuami arfininngorpat tusarnaartitsissaaq.
Rasmus Lyberthimi ullumikkut 70-iliivoq. Taanna 1970-ikkunnili nunatsinni nipilersornermi tusaamasaanerpaat ilagilerpaat.
Taassuma nalliunneranut atatillugu inuusuttuuffigisimasaani Nuummi Katuap paarlersuani tusarnaartitsissaaq.
Nipilersortartorlu Nuummut qujaniarniarluni KNR-ip radiokkut aallakaatitassiaanut, Nunatta Nipaanut oqarpoq.
AAMMA ATUARUK Rasmus Lyberth nipilersortartumut nersornaasiuttakkamut innersuunneqartoq
- Manna angajullequtinnik meerartaarfigivara. Nuannersorpassuarnik misigisaqarfiginikuuara. Aamma soorunami Nanortalik Maniitsorlu, inuuffiga meeraaffigalu. Meeqqakka tamaasa maannakkut ilagivakka. Aamma inoqatinut tamanut malinnaasimasunut qujaniarlunga taamaaliorniarpunga, Rasmus Lyberth oqarpoq.
Rasmus Lyberthip LP-liaa siulleq ”Erningaa” 1974-imi saqqummerpoq, tamatumalu kingorna nunatsinni nunanilu allani nuannarinnittorpassuaqalersitsisunik saqqummersitsisarluni.
Rasmus Lyberth Namminersornerullutik Oqartussat kulturikkut nersornaasiuttagaanik Aka Høegh Kiistat Lundilu peqatigalugit 1989-imi nersornaaserneqarpoq.
Rasmus Lyberth Danmarkimi ullumikkut najugaqarpoq.
Tusarnaartitsineq aqagu nalunaaqutaq 21:00 aallartissaaq.
Angut eqqumiitsuliornermik piginnaasarpassualik
Katuap allaaserisaa naapertorlugu Rasmusip nipilersoqatigisartakkani aalajangersimasut appisimaaqatigissavai, tamatumali saniatigut nunatsinnit, Danmarkimit nunanillu allanit nipilersortartut taassuma atortagaanik ilisimaneqarluartunik tusarnaartitsissapput.
- Rasmus Lyberth kalaallit erinarsortartuisa nunatta killeqarfiata avataani tusaaneqarsinnaanngorneranut siulliit ilagalugit ammaassisuuvoq. Uffa kalaallisuinnangajak oqaasertalinnik annerusumik appisimaartaraluarluni, kulturikkut illorsuaq Rasmus Lyberth pillug allappoq.
AAMMA ATUARUK Rasmus Lyberth qalipaasartutut saqqummertoq
- Europami, Amerika Avannarleq aamma nunarsuatta ilaat allat tusarnaartitsiartorfigisimavai aamma nuusianik (CD-nik) kisimiilluni allanillu peqateqarluni saqqummersitsisimalluni. Kalaallit Nunaata iluani silataanilu erinarsortartumut nersornaasiuttakkanut arlalinnut innersuunneqarsimavoq ilaatigut ukiup taalliullammaatut, erinniullammaatut aamma takutitsillaqqinnerpaartaatut arlaleriarluni nersornaaserneqarsimalluni.
Rasmus Lyberth ukiut 50-it sinnerlugit nunatsinni nipilersornikkut malunniuteqarluarnermi saniatigut filmiliornermi isiginnaartitsissutinilu aamma suliaqarsimavoq, tamanna upernaaq kingullermi takutippaa, tassanilu isiginnaartitsissusiaq ”Tarnima nammatai” isiginnaartitseqataaffigaa, Katuaq allappoq.