Nalunaarusiaq: Inuusuttunit imminut toqoriaraluarsimasunit ikittuinnaat ajornartoornermi upalungaarsimasumik oqaloqateqarsimapput
Inuusuttut imminut toqoriarsimagaluartut sisamaraterutaat ikiorneqartanngillat.
Tamanna nunatsinni inuusuttut tarnikkut peqqissusaannut tunngasumi nalunaarusiami nutaami atuarneqarsinaavoq.
- Imminut toqoriaraluarsimasut 15 procentiinnaat tarnip pissusianik ilisimasalimmut attaveqarsimasartut, ajoraluartumik takusinanavarput. Procentialu ataasiinnaq imminut toqoriaraluarnermi kingorna tarnikkut ajornartoornermi upalungaarsimasunik oqaloqateqarsimapput, Charlotte Brandstrup Ottendahl oqarpoq.
Ikiorneqarnissat pisariaqartippiuk?
Imminut toqunnissamik eqqartsaateqaruit imaluunniit kisimiittutut misigisimaguit Tusaannga oqarasuaammut 801180-imut imaluunniit sms-ikkut 1899-ikkut attavigisinnaavat.
Oqaloqatiginninnerit akeqanngilaq kinaassutsimillu taasisoqartariaqarani.
Tusaannga pillugu uani annerusumik atuagaqarsinnaavutit.
Taanna naalagaaffiup inuiaat peqqissusiannik misissuiviata ataani inuiaat kalaallit peqqissusaannik misissuivimmi sulisuuvoq, nunatsinnilu inuusuttut tarnikkut peqqissusaat pillugu aamma nalunaarusioqataalluni.
Kisitsisit ernumanartut
Nalunaarusiaq taanna nunatta inuinik 2018-imi misissuinermik, inuusttut 15-iniit 34-inut ukiullit peqataafigisaaannik, aallaaveqarpoq.
Taakkua pingajorarterutaaat inuunermi ilaani imminut toqunnissamik eqqarsaateqarsimallutik misisuisunut akipput.
AAMMA ATUARUK Politimesteri: Nunatsinni imminut toquttu amiilaarnaannartumik amerlapput
Taakkunannga pingajorartertit marluk imminut toqoraraluarsimapput.
Taakkualu 24 procentii kigornatigut ikiorneqanngivissimallutik akipput.
- Taakkua ilarpaalui ikinngutiminnik ilaquttaminnillu imminut toqoriaraluarnermik kingorna oqaloqateqarsimallutik oqarput. Taavali imminut toqoriaraluarsimasut 24 procentii namminneq oqaluttuarnerat naapertorlugu ikiorneqanngivissimapput. Tamannalu isumakulunnarpoq, Charlotte Brandstrup Ottendahl oqarpoq.
Arlallit ikiorneqassasut
Isumaginninnermut naalakkersuisup , Inuit Ataqatigiinneersup, Mimi Karlsenip nalunaarusiami inernerusut alianartutut tiguvai.
Nalunaarusiaq pillugu paasissutissat
Nalunaarusiaq 'Kalaallit Nunaanni 15-iniit 34-nik ukiullit akornanni eqqarsartaatsikkut peqqissuseq aamma peqqissuseq - Peroriartornermi atukkat, illersuutinut pissutaasut aamma aarlerinaatinut pissutaasut pingaarutaat'-nik qulequtaqarpoq.
Nalunaarusiaq Naalagaaffiup inuiaat peqqissusiannik misissuiviata, Inuiaat kalaallit peqqissusaannik misissuiviup Syddansk Universitetillu suliaraat.
Nunatsinni inuusuttorpassuit periariartornerissaarsimasuttut inuusuttunnerminnilu inuunerissaartut nalunaarusiap inernerata takutippaa.
Tamatumali saniatigut inuusuttunik peroriartornerminnilu atugarliornertik pissutigalugu inissisimanerluttunik aamma peqarpoq.
Nalunaarusiaq tamaat uani atuarsinnaavat.
- Kisitsisit alianarput. Ikiorneqarnissamik pisariaqartitsisunut tamanut ikiuisinnaanissarput sulissutigissavarput, isumaginninnermut naalakkersuisoq oqarpoq, nangillunilu:
- Naalakkersuisunit tassunga tunngatillugu susassaqarfimmi assigiinngitsuni - pingaartumik kommunini isumaginninnermi suliaqarnermi inuusuttunut isumaginnissinnaasunik tassannga innersuussisinnaanermik piginnaasaqalersitsisunik ineriartortitsissaagut.
Mimi Karlsenip naalakkersuisut imminut toquttarnermik pingaveersaartitsinissamut periusissiaq nutaat 2022-mi upernaakkut saqqummiunnissaa pilersaarutigigaat innersuussutigaa.
Pieriusissiaq kingulleq 2019-imi atorunnaarpoq.