Randi Broberg IA-mit nersualaarneqarpoq
Naalakkersuisooqatigiinniilli tamanna tapersersorneqarpasinngilaq. Illuatungiliuttulli Randi Brobergip suaartaataanut paasinninnerupput. Naak IA-mi innuttaasunik taasisitsinissamut isumaqataanngikkaluarlutik, isumaqarput uranimut tunngasut ima misissorneqarsimatiginngitsut, innuttaasut isummernissamut naammattumik paasissutissinneqarsimallutik.
Naaja Nathanielsen ilaatigut isumaqarpoq inuiaqatigiit iluamik paasissutissinneqarsimanngitsut. Nathanielsen aamma oqarpoq nalunaarusiortoqarnissaa Inatsisartuni aaliangerneqareertoq. Taannali suli saqqumminngilaq.
- Tassalu Randi Broberg Parti Inuillu isumaqatigaagut, paasissutissat amerlanerusariaqartut. Aalajangiitigata uuma sunik kinguneqarsinnaanera qanorlu isumaqarsinnaanera pillugu paasisaqarnerussagutta minnerpaamik nalunaarusiat, Inatsisartut piumasaat taavalu aamma folketingip piumasaat suli amigaatigaavut, Naaja Nathanielsen oqarpoq.
Randi Brobergip siunnersuutaa illuatungiliuttunit nersualaarneqaraluartoq, Atassumminngaanniit iluarineqarpallaanngilaq.
Innutaasut naammattumik paasissutissinneqareertut, Atassummi siulittaasoq Gerhardt Petersen isumaqarpoq. Uranimut naaggaarluinnarnerup atorunnaarsinneqarnera kujataani suliffissanik aamma pilersitsissasoq isumaqarpoq.
-Atassummi Inatsisartunut qineqqusaarnikuuvugut nul-tolerance peerneqarnissaa pillugu. Pissutigalugu, pingaartumik kujataani annertoorujussuarmik suliffissaaleqiffiusumi, taavalu aamma minnerunngitsumik nunatta karsianut isaatitsisinnaasumik, Atassummi siulittaasoq Gerhardt Petersen oqarpoq.
Randi Brobergip siunnersuutaa Siumuminngaanniit tapersersorneqarnissaa aamma piviusorsiorpalunngilaq.
Tassami Jens-Erik Kirkegaardip siusinnerusukkut oqaatsigereerpaa uranimut naaggaarluinnarneq Inatsisartunut 2013-imi qinersinissamut atatillugu qineqqusaarnermi sammisaasimasoq pingaaruteqartoq, Naalakkersuisullu isumaqartut, qinersisartut qinersinermi apeqqummut tassunga akuersaarsimanerat pimoorunneqartariaqartoq.
