RAL umiarsuarnik sanaartortitsivoq
Sanaartornermut isumaqatigiissummik atsiornikkut piginneqatigiiffik maannamut aatsaat taama ataatsimoortunik amerlatigisunik pisivoq.
Tyskit umiarsualiorfiat P+S Werften, umiarsualiortuussaaq.
Royal Arctic Linep siulersuisuini siulittaasoq, Martha Labansen, pisinissamut iluarisimaarinneqaaq, inuiaqatigiillu attaveqatigiinnerannut pingaaruteqarluinnartutut taallugu.
Umiarsuit sisamat nutaat, nunaqarfinnut assartuinermut naleqqussagaasut, umiarsuaatitoqqat ilaannut taartaassapput.
- Royal Arctic Bygdeservicep umiarsuaaraatai aserfallassimasorujuupput ullutsinnullu naleqqunnatik, taamaattumik umiarsuit nutaat tigunissaat assut qilanaaraarput. Taamaalilluta pitsaanerusumik eqaannerusumillu atugaqalissaagut containerit atornerulerlugit, tamannalu aallaqqaataaniit sullittakkatsinnut nunaqarfinnut usinik assartuititsisussanut sullittakkatsinnullu avammut tunisisartunut - nalinginnaasumik qerisunik assartuisitsisartunut - pitsanngorsaataassallutik, Royal Arctic Bygdeservicemi pisortaaneq, John Rasmussen, oqarpoq.
Umiarsuit tallimat tamarmik aappaagu 2012-ip ingerlanerani tunniunneqassapput, tamannalu periarpat Royal Arcitc Linep umiarsuaatitoqaaasa ilaat atorunnaarsinneqassapput.
Umiarsuit tallimat tamarmik katillutik 700 millioni koruunit missaannik akeqassapput.
Umiarsuit akiisa 20 procentii Royal Arctic Linep nammineq pigereerpai, sinnerilu aningaasanik attartortarfinnit nunani tamalaaneersunit atorniarneqarput.
