RAL-p umiarsuaata qalerallit qerisut Kullorsuarmut piffissaarukkami qimaannarai
Aalisartoqarfiup 450-it missaannik inullip, qaleralinnut tunitsiviata qerititsivia upernaaq maajip aallartinneranili ulikkaarpoq. Aalisartullu taamanernit maannamut tulaassuinngillat, tunisassiorfimmilu sulisut 20-t missaanniittut angerlarsimaannarput.
Umiarsuaatileqatigiiffiup Royal Arctic Linep umiarsuaa, Siuana Arctica, ukioq manna siullerpaamik sapaatit akunnerata naanerani Kullorsuarmiikkami qalerallit qerisut nassiussassat piareeqqasut attorsimanngilai.
Tamanna umiarsuaatileqatigiiffimmi umiarsuit angalanissaasa pilersaarusiornerannut aqutsisup uppernarsarpaa.
- Nassatarpassuaqarluta taavalu usigiaanerup arriittuararsuullunilu pisariunikuunera peqqutaalluni angumerinngitsoorpagut qaleraliit tigunissaat Aningo Broberg oqarpoq.
Pisortaq RAL-mut: Qalerallit aasigit
Umiarsuaq qaleralinnik tigusinani kujammukarluni maanna aallareermat, Arctic Fish Greenland A/S-mi pisortaq immikkut iliuuseqaqqusivoq.
- Royal Arctic Line umiarsuaatinik ulikkaarpoq. Qaleralinnik aallertiinnarluguluunniit Royal Arctic Line iliuuseqartariaqaraluarpoq. Aallartinniarluta utaqqivugut. Inuussutissarsiornerput maani upernaarli uninngavoq, Frederik Olsen oqarpoq.
Taassuma qalerallit qerisut, Kullorsuarmi tunisat, ingerlaqqittussat 500 tonsit missaanniinnerarpai.
Pilersaarusiortut
Taassuma kissaataa, tassa umiarsuarmik qaleraliinnarnik aallertumik Kullorsuarmukartoqarnissaa piviusunngulerunarpoq.
RAL-immi umiarsuaatini, Siuana Arctica, qaleraliinnarnik aallertillugu angalanissamut pilersaarutaareersut saniatigut Kullorsuarmukartinnissaa pilersaarusiuleruttorpaa. Tikiffigisinnaasaalu ullulerneqareerpoq.
- Una iluatsissinnaagutsigu immaqa juulip aappaani, Aningo Broberg oqarpoq.
Umiarsuaq pilersaarutit malillugit juulip arfineq-pingajuanni aatsaat Kullorsuarmiittussaagaluarpoq. Tassalu qalerallit ullunit arfinilinnik sioqqutsisumik tiguneqarsinnaalernissaat umiarsuaatileqatigiiffiup maanna anguniarpaa.