RAL-ip uulia kinertup inerteqqutigineqarnissaa taperseraa
Naalakkersuisut umiarsuit Issittumi uulia kinertoq atorlugu angalaqqusaajunnaarnissaat sapaatip-akunnerata siuliani akueraat.
Sulisitsisut oqarnerat naapertorlugu nunatsinni Royal Arctic Line kisiartaalluni HFO-mik, tassa ikummatissanik nunarsuarmi mingutsitsinerpaajusumik suli ikummatissaqarpoq.
AAMMA ATUARUK WWF HFO pillugu: - Uagut Issittumi pinngortitamut qanoq pitsaatigerusunnerluta nammineq aalajangertussaavarput
Umiarsuaatileqatigiiffiullu inerteqquteqarnissaq taperserluinnarpaa.
- Ukioq manna februaarimi marsimi inerteqquteqarnissamut ilusilersueqataavugut. Soqutigisaqatigut pingaarnerit Danske Rederier peqatigalugit danskit avatangiisinut ministereqarfiat ataatsimoorluta tunniussaqarfigaarput. Issittumi umiarsuaatileqatigiiffinni annersaatut nalinginnaasumi soqutiginartuuvugut, pisortaq, Verner Hammiken KNR-imut mailikkut allappoq.
Polarkode suua?
Polarkode nunat tamalaat akornanni malittarisassaavoq, umiarsuarnut Issittumi angalasunut pissutsinut pitsaanerusumik sakkussaqartitsinissamut ilaatigut qulakkeerisussaq.
Umiarsuit sikoqarluartumi angalasinnaanissamut sanaartugaassapput, sillimaniarnissamullu atortorissaarutinik pisariaqartunik useqassallutik.
Takutitsineq pingaaruteqartoq
HFO-mik inerteqquteqarneq Naalagaaffiit Peqatigiit imarsiornermi suliniaqatigiiffianit, International Marine Organisationimit 2021-mit atuutilerneqarnissaa naatsorsuutigineqarpoq. Taannalu 2024-mi juulip ulluisa aallaqqaataani atuutilertussaatinneqarpoq.
Angallatinulli polarkodemik malinnittunut inerteqquteqarneq 2029-mi juulip ulluisa aallaqqaataannit aatsaat atuutilissalluni.
Piffissaliussallu Arctic Linemut ajunngitsut, pisortaq nassuiaavoq.
- Inerteqquteqarnerup umiarsuarnut pisoqqanut 2024-mit atuutilernissaa umiarsuarnullu Issittumut naleqqussakkanik immikkut ittumik uuliamut tankeqartunut 2029-mit atuutilernissaa pitsaavoq.
- Naligiissaakkamik aaqqiissuteqartoqarnera aningaasaliinitsinnut kiisalu amerlanerit uagut ilanngulluta pisariaqartumik allanngortitsinissatsinnut piffissaliisoqarnera pissutigalugu ilorrisimaarpugut. Tamanna takutitsineruvoq pingaaruteqartoq, Verner Hammeken allappoq, nangillunilu:
- Ukiut qulingiluat ukiualuupput, nunarsuarmilu siuariartortoqarnerani HFO-mik atuinani aningaasaqarnikkut illersorneqarsinnaasumik ingerlatsilernissamut piffissami qaninnermi periarfissaqarpoq.
HFO suua?
HFO, uulia kinertoq, umiarsuit ikummatissaanni nunarsuarmi mingutsitsinerpaavoq.
HFO-p immap kissassusaanni appasissumi katersorniartarnera ajornakusoortorujussuuvoq ilaatigullu ajornarluinnarsinnaalluni.
HFO-mik annertuumik kuuttoqassappat, uulia sivisuumi immamiissinnaavoq, imaluunniit sinerissani uuliap nunniffigisimasinnaasaani uninngasinnaalluni.
Paasissutissarsiffik: Naalakkersuisut
Apeqqutit ammasut
Royal Arctic Linep uuliamik kinertumik atuiunnaarnera qanorpiaq akeqassanersoq KNR-ip akissuterserusukkaluarpaa.
Aammattaaq allannguineq nunatsinni atuisartunut arlaatigut sunniuteqassanersoq paaserusukkaluarparput.
Umiarsuaatileqatigiiffiulli annerusumik tamanna oqaaseqarfigerusunngilaa.