RAL-ip pisortaanera tunuartoq
Royal Arctic Linep pisortaanertut atorfik inuttassarsiortussanngorpaa.
Tamanna pisussanngorpoq 2015-imili pisortaanerusoq, Verner Hammeken tunuarmat.
RAL taama tusagassiorfinnut nalunaarpoq.
Ulluinnarni aqutsinerup aaqqissuussaanerup immikkoortuini tamani peqqissaartumik atassuserneqarnissaanut aqutsinikkut piginnaasanik nutaanik pisariaqartitsisoqalerpoq taamaattumillu siulersuisut Verner Hammeken isumaqatigiissuteqarfigaat Royal Arctic Linemi pisortaanertut tunuassasoq tamatumunngalu peqatigitillugu Royal Arctic Linemi pisortaanermik nutaamik pissarsiornissamut suliaq aallartinneqassalluni, RAL allapput.
- Verner Hammeken allanguinernik arlalinnik suliaqarsimavoq. Maannali ingerlaqqittariaqalerpugut. Taamaattumik Verner-p pisortaanertut atorfimmit tunuarnissaa inuttaalu isumaqatigiissutigaarput, Royal Arctic Linemi siulersuisut siulittaasuat, Pâviâraq Heilmann, KNR-imut oqarpoq.
Illuatungeriit tamassi isumaqatigiissutigisassinnik?
- Suleqatigiikkunnaarnissaq Verner-lu isumaqatigiissuteqarfigaarput. Taama oqarusuppunga.
CCO pisortaanerugallassaaq
Royal Arctic Linemi tuniniaanermut pisortaq Niels Clemmensen atorfinitsitsisoqarnissaata tungaanut pisortaanerugallartussatut atorfinitsinneqassaaq.
KNR pisortaq tunuartoq oqaaseqartinniarlugu attaviginiaraluarpaa, iluatsinnaguli.
Verner Hammeken 1. august 2015-imi atorfinippoq. Umiarsuaatileqatigiiffissuup Mærskip angalasussanik ataqatigiissaarinermut immikkoortortaqarfiani pisortatut Damcomi Centralafrikamiittumi sulinini taamani qimallugu RAL-imi pisortanngorpoq.
- Verner malunnaateqarsimaqisunik suliaqarneranut qutsavigisariaqarpoq, uukiuni arfineq-pingasuni suliai ajunngeqaat. Kisianni sulineq nangissavarput, Pâviâraq Heilmann oqarpoq nangillunilu:
- Kalaallit Nunaata piumasai piviusunngortissavagut. Innuttaasut piumasaat. Siulersuisoqatigiit aamma piviusunngortikkusutaminnik kissaateqarpoq. Tamakkuupput maanna suliaralugit aallartitassavut.
Verner Hammekenip umiarsuaatileqatigiiffiup Namminersorlutik Oqartussanit pigineqartup annertuumik allanngortiteriffigineqarnera siuttuuffigaa. Piffissami pineqartumi umiarsuaatinik nutarterineq annertooq ingerlanneqarpoq, aaqqissuussaaneq ingerlatsinerlu Nuummi katersorneqarput, Nuummi umiarsualivik nutaaq atorneqalerpoq aamma Danmarkimi ingerlatat Århusimut nuunneqarlutik.
