RAL-imi siulersuisut taarserneqarput inuusuttumillu siulittaasortaarlutik
Siulittaasunngortoq tassaavoq 39-nik ukiulik Kuno Fencker, Martha Labansen kingoraarlugu siulittaasunngortoq.
14 millionit koruunit. Tassa Royal Arctic Line-ip akileraarutit ilanngaatigereerlugit 2013-imi amigartoorutai. Royal Arctic Line-ip 2013-imi angusai Naalakkersuisunit naammagineqanngillat, naallu siulersuisuni ilaasortat arfineq-pingasuusut akornanni arfinillit taarserneqaraluartut, Royal Arctic Line-ip ingerlanneqarneranik eqquinerlunnavianngitsoq, Naalakkersuisut siulittaasuata Aleqa Hammondip, piginnittut, tassa Namminersorlutik Oqartussat sinnerlugit oqaatigaa:
- Siunertaa allannguuteqassanngilaq inuit allannguuteqaraluarpataluunniit, taanna pingaaruteqarpoq. Aamma isumaqarpunga siulersuisut taarserneqarnerisigut isit nutaat nukissallu nutaat pilersinneqartartut, siunnerfiillu aamma nukittorsarneqarsinnaanissaannut periarfissaqartuarneranik aamma isiginiarpara, Naalakkersuisut siulittaasuat Aleqa Hammond oqarpoq.
Naalakkersuisuni ilaasortat arlallit inuusuttut, KNI-llu siulersuisuini siulittaasoq inuusuttoq. Periuseq taanna Royal Arctic Line-imi siulersuisunik toqqaaniarnermi aamma atorneqarunarpoq, tassami Royal Arctic Line-imi siulersuisuni siulittaasunngortoq tassaavoq 39-nik ukiulik Kuno Fencker. Taanna Cairn Energymi sulianik ataqatigiissaarisutut sulisuuvoq.
Assartuussinermik ilinniagartuujuvoq, ataqatigiissaarinermik misilittagaqarluni. Shippingimik, tassa assartuussinermut tunngasunik ilinniarnerminut atatillugu Royal Arctic Line-imi misilittagaqarpoq.
Naallu siulersuisuni sulinermik misilittagaqarpallaanngikkaluarluni, Royal Arctic Line-imi siulittaasutut toqqarneqarnini nuannaarutigeqaa, sulinissanilu qilanaaralugu. Sunali siullertut anguniarnerlugu oqaatigisinnaanngikkallarnerarpaa:
- Oqarsinnaanngikkallarpunga siullertut suna, sunarpiaq, nalunngikkaluarpara, kisianni siulersuisuni ilaasortat tamaasa oqaloqatigeqqaarlugit aatsaat nalunaarusiorumaarpugut qanoq iliorniarnerluta, Royal Arctic Line-mi siulersuisuni siulittaasunngortoq Kuno Fencker, oqarpoq.
Taanna Naalakkersuisut siulittaasuannit aamma nersualaarneqarpoq:
- Kuno Fenckerip tunniussinnaasai pingaaruteqartuupput. Isummersorluarsinnaavoq, inuusukkaluarlunilu misilittagai annikigisasssaanngillat, aammalu isummersortarneratigut anguniagaqarusussuseqarnermigullu pitsaasumik misilittagaqarpoq, aamma isumaqarama pissusissamisoortoq inuiaqatigiinni ikaarsaarfiit sapiissuseqarfiginerusariaqarivut, inuusuttortavut pikkorissut aamma atorneqassapput, akisussaaffiit inuusuttortatsinnit tigujartorneqarnissaannut ilutigalutigu, Naalakkersuisut siulittaasuat Aleqa Hammond oqarpoq.
