RAL: Angusarput naammaginngilarput
Aningaasaqarnermik sukangasumik aquitsineq, sulisunik ikilisaaneq aamma assartuinermut akisitinneqartuni januaari 2009-mi qaffaaneq Royal Arctic Linemi sinneqartoorutit ukiup siuliani sinneqartoorutinut naleqqiullugit marloriaatinngorsimanerannut pissutaapput.
Suliffeqarfissuup akileraarutit akilinnginneranni sinneqartoorutai 2009-mi 23 millionit koruuniupput, akileraarutit ilanngaatigereerlugit 18,5 millionit koruuniullutik. Ukiup siuliani 10,1 millioni koruuniupput, akileraarutit akilereerlugit 6,2 millioni koruuniusut.
Angusat taama pitsaatigigaluartut, anguniakkamissut 2009-mi ukiup qiteqqunnerani nalunaarutigisaminnit angusat 10 millioni koruuninik appasinnerunerat naammaginngilaat. Angusartik siunissamut aningaasalersuinissamut naammanngitsutut siulersuisut nalilerpaat.
Isertitassatut tunngavigineqartut ikileriarnissaasa naatsorsuutigineqarnerat pissutigalugu ukiup aallartinneraniilli suliffeqarfissuup aningaasartuutai qitiutinneqarput. Tamanna qularnaarneqarsinnaavoq aningaasartuutit 2008-mut sanilliussilluni katillugit 66 millionit koruuningajannik appariarsimammata. Taakkununnga ilaapput allaffissornermut aamma
sulisoqarnermut aningaasartuutit 14 millioni koruuninik appariarsimasut. Peqatigitillugu assartuinermut akigitinneqartut 5 procentit 10 procentillu akornanni qaffanneqarput.
Royal Arctic Linep tusagassiorfitsigut nalunaarutaa uani ataani atuarneqarsinnaavoq.