Rajenda Pachauri siulittaasutut qinigaaqqippoq

Naalagaaffinni Peqatigiinni silap pissusaanut immikkut ilisimasallit siulittaasuat, ilisimatooq, indiamiu, Rajenda Pachauri, ilisimatuut katersuuffianni tassani piffissami aggersumi siulittaasooqqittussanngorlugu qinigaasimavoq. Suleqatigiiffiup taassuma ilaatigut nunat CO2-mik aniatitsinerisa minnerulernissaat ilungersuutigisaraa aamma nunarsuup kiatsikkaluttuinnarnerata kingunerisassai nunarsuarmiunut minersoqqussutigisarpai.

septembarip 03-at 2008 06:13

Pachauri silap pissusaanik immikkut ilisimasalinnut siulittaasutut siullermik 2002-mi qinigaavoq. Tamanna pivoq, amerikamiut kissaateqarnerat naapertorlugu, taamanikkut siulittaasuusoq, Robert Watson, tunuartinneqarmat, taamani Det Hvide Husimit naammagittaaliuutigineqarmat, Watson-ip nunarsuup kiatsikkiartornissaa mianersoqqussutigimmagu, præsident Bushilu iliuuseqannginnerarlugu isornartorsiormagu.

USA-p akuliunnera pissutigalugu avatangiisit pillugit suliniaqatigiiffiit Rajenda Pachaurip qinigaanera tunuarsimaarfigigaluarpaat, kisianni indiamiup ilisimatuup taassuma silap pissusaanut ilisimatuut hunnorujulikkaat namminersorluni isornartorsiuillunilu siulersornissaat ajunngitsumik takutissimagaa, Ritzau allaaserinnippoq.

Pachauri silap pissusaanut ilisimasalinnut siulittaasutut, USA-mi præsidentimut tulliusimasoq Al Gore peqatigalugu Nobelip eqqissinermut nersornaasiuttagaanik siorna nersornaatisivoq.

Rajenda Pachauri siulittaasutut qinigaaqqippoq

Aamma atuaruk