Radovan Karadzic Haagimi eqqartuussivissuarmi
Serberit Bosniami siuttorisimasaat, Radovan Karadzic, tigusaanerminit sapaatip-akunneri arfinillit qaangiutillartullu, sorsunnermi pinerluuteqarsimasunut Naalagaaffiit Peqatigiit Haag-imi eqqartuussivianni ullumi issiavoq. Tassani nassuiartussaavaa inuiannik toqoraasimanerluni, sorsunnermilu pinerluuteqarsimanerluni.
aggustip 29-at 2008 17:27
Karadzic unnerluussaanini pillugu oqaaseqarumanngilluinnarpoq, taamaammat ”pinngitsutut” eqqartuussiviup nalilerpaa, nutaarsiassaqartitsivimmi Ritzau’imi taama allaaserinnittoqarpoq.
Eqqartuussineq maanna aallartissinnaanngorpoq, inatsisilerinermulli tunngasortasa aallartinnissaat qaammatit arlalissuit qaangiuppata immaqa aatsaat aallartinneqassalluni. Radovan Karadzic, 63-inik ukioqartoq, Bosnien-Hercegovinami 1992-imiit 1995-ip tungaanut sorsuuttoqarmat inuiannik nungusaasimasutut unnerluutigineqarpoq. Inuit 100.000-it missaat sorsuuttoqarnerani toqutaasimasorineqarput.
