Radovan Karadzic eqqartuussivimmut apuutinngilaq
Karadzicimi nammineerluni ullumi takkussimanngilaq. Taamaattorli suliassaq ukiuni 14-ini utaqqisinneqareerluni kiisami manna aallartinneqarmat qanigisaasut oqiliallaatigaat.
Eqqartuussinissaq ullaaq aallartissammat Bosniamiut arnat amerlaqisut sorsunnermi pinerluuteqarsimasunut eqqartuussiviup Haagimiittup saavanut inississimapput. Taakkua ilagaat Hadela Milesevic Bosniap illoqarfiisa pingaarnersaannit Sarajevomeersoq. Taassuma suleqatigiit imminnut inuiaqatigiinnik ulorianartorsiortitaasunik taagortut siulersorpai. Toqutaasimasut, inunnillu toqoraanersuarmi toqutaasut pillugit peqatigiiffiit 18-iusut sinnerlugit sulivugut ilimagalugulu suliassaq ullumi aallartinneqassasoq. Hadelap arnallu allat ilaatigut allagartarsuaq 30 meteringajannik takissusilik tigummiarpaat, angutit nukappiaqqallu Bosniami illoqarfimmi Srebrenicami 1995-imi toqoraanersuarmi toqutaasut tamarmik atiinik allaffigineqarsimasoq. Arnat ilaasa uimik ernimillu toqutaasimasut assingi nassarpaat, aammalumi Hadelamut arnanullu allanut Karadzicip eqqartuunneqarnissaa inuttut nammineq tunngassuteqarluni. Karadzic inuit 200.000-it toqutaanerannut pisuuvoq, Hadela Milesevic oqarpoq allagartarsuarmilu aqqit 8.000-iusut pillugit nassuiaalluni. Karadzicip takkutinngitsoornermigut eqqartuussinermik pinngitsoortitsisinnaanera tassuma isumakuluutigaa. Radovan Karadzicip manna cirkusinngortippaa, suliassaq naammassineqaqqunngilaa, tamannalu iluatsissaguniuk ajussaqaaq, arnaq taanna taama oqarpoq. Pingaaruteqarpoq paasissallugu manna akiniaanerunngimmat, Hadela erseqqissaavoq. Eqqugaasut naapertuilluartumik iliornissaq namminneerlutik isumagissagunikku taava akiniaaneq sorsunneq eqqissiviilliornerlu annertusiinnassapput Bosniamilu eqqissisoqanngisaannassalluni. Amerlaqisut toqoreersimapput, uagulli annattuusugut amiakkuusugullu naapertuilluarneq kissaatigaarput, nunatsinni eqqissisoqassappat tamanna piumasarineqartariaqarpoq, Hadela Milesevic oqarpoq.
