Radon pillugu nutaamik malittarissasiuunneqarpoq
Nunatta kujataani illuliortussanngoruit, taava eqqumaffigissavat, Namminersornerullutik Oqartussani Ineqarnermut Attaveqarnermullu Pisortaqarfik 2007-imi atuutilersumik sanaartornermut nutaamik malittarisassaliorsimammat. Sanaartorfigisat radoneqarneranik uttorneqassaaq, tamaanilu radoneqarneranik uuttuinermi atorneqartartoq kubik meterimut 200 becqurel (bækerel) qaangersimassanngilaa.
Ineqarnermut Attaveqarnermullu Pisortaqarfiup allaffiani pisortaq Ruben Svendsen allappoq, radioavisip radon pillugu ilanngutassiaanut atatillugu ilisimatitsissutigissallugu, sanaartornermi immikkut malittarisassat nutaat 2006 –mi suliarineqarsimasut atuutilersimammata.
Malittarisassani 2007 –miit atuutilersuni piumasaqaataalersimavoq, Arsummiit kujammut sanaartukkat tamarmik naqqup ataatigut silaannarissartarfilerneqartalissasut imaluunniit illup tunngavia ima sananeqaatimigut pitsaatigissaaq ussilluinnartuussalluni quppaqanngilluinnarluni, nunap iluaniit silaannarmik isaaasoqarsinnaassanani allaat.
Ruben Svendsen-ip ilanngullugu ilisimatitsissutigaa, malittarisassani nutaani radon pillugu paasissutissat sumiittut nassaarineqarsinnaaneri innersuussutigineqarsimammata.
Aamma allappoq malittarisassani piumasaqaataalersimasoq, illup iluani radon –imik uttuutip kubik meter –mut 200 becqurel qaangersimassanngikkaa.
Radon gas –iuvoq radioaktiv-usoq nunap iluanit aniasoq. Taamaattumik sanaartornermi malittarisassat piumasaqaatigaat, gas –ip taassuma illumut isaannginnissaa sanaartukkat isumagineqarluarnerisigut, soorlu illup tunngaviata, qisuisa, natiata, naqqup ataata natiata iigaasalu ussilluinnartumik suliarineqarnerisigut anguniarneqassasoq. Aamma soorunami tassani pineqarput ruujorilersornermi iikkami putut silaannarissartarfiillu aqqutaat.
Sanaartornermi malittaisassani aamma ilanngullugit takuneqarsinnaapput, piumasaqaatit ullumikkut atuutilersut siornagut sanaartugaasimasut qanoq ilillugit pitsanngorsarneqarsinnaaneri.
