Radiokkut aallakaatitassap naggueqatigiit inuit oqaasiinik annaassiniartoq

Radiokkut aallakaatitassiap oqaatsit, Inuvialuktun, siuarsarniarlugit tusarnaartut oqaatsinik ullut tamaasa tusartissavai.

Canadap kippasissortaani, Alaskamut killeqarfimmi naggueqatigiit inuit oqaaseqqaavisa ilaat ulorianartorsiorput.

Inuialuit namminneq oqaatsitik atorlugit oqaluttarsimapput, tassa Inuvialuktun. Maannali innuttaasunit 3100-nit 600-t kisimik oqaatsitik sumiorpaluutaalluunniit atorlugit oqalussinnaapput.

CBC Radiokkulli aallakaatitassiarineqartartup ‘Tusaavik’up oqaatsit siammarterniarsarilerpai.

Dodie Malegana nunaqarfimmit Aklavimmeersoq aallakaatitsisartuuvoq. Taanna Inuvialuktun oqaluttuuvoq aallakaatitamilu toqqorsivimmit utoqqarnik oqaluttuartunik ilaatigut aallakaatitsisarluni.

Aallakaatitami ullormut ilinniagassamik ilaqartuaannarpoq, taamaalillutik tusarnaartartut oqaatsimik nutaamik ullormut ilikkagaqarsinnaasassallutik. Dodie Maleganap oqarnera naapertorlugu Inuialuit namminneq oqaatsiminnik ilikkaqqinnissaat pingaaruteqarpoq.

Aallakaatitassiaq ‘Tusaavik’ ullut tamaasa akunnermik ataatsimik sivisussuseqartoq aallakaatinneqartarpoq.

CBC-mi Issittup kippasissortaani oqaaseqqaanut tunngasunik allanik tallimanik aamma aallakaatitsisoqartartoq, aallakaatitassiamik ingerlatsisoq, Janice Stein KNR-imut oqarpoq.

Taakku saniatigut Canada tamakkerlugu radiokkut tuluttut franskisullu aamma aallakaatitsisarput.