KNR Radio uummaarinnerusoq
Sapaatip akunnerani aggersumi aallakaatitassiat nutaat arlallit tusarnaarneqarsinnaalissapput, ukiullu naannginnerani tusarnaartut ullaarnganiit unnuup tungaanut toqqaannartunik tusagassaqartassallutik.
Tusarnaartartutta nuannersumik pissanganartumillu radiokkut tusagassaqarnissaat pingaartipparput. Aliikkutassiat, soqutigineqartut ullumikkut pisunit aallaavillit aallakaatinneqartassapput, KNR Radiomi pisortaq Masaana Egede oqarpoq.
Ullaaralaakkut Pipaluk Egede Nielsen, Salome Hansen Andreas Poulsenilu aallakaatitsivimmiit tikilluaqqusillutik, maanna pisut aliikkutaasinnaasullu Nunatta Nipaanit aallaakaatittassavaat.
Taakku tulleralugit Katrina Lindberg Boassen Maria Kuitse Andersenilu akunnerup affaata iluani meeqqat silarsuaanni pinnguaqataasassapput, tusarnaartut peqatigalugit aliikkutassiap Appilaarup aallakaatinngilaattaani.
Kulturimut tunngasunik aallakaatitsineq toqqaannartoq, Puilasoq, Malînànguaq M. Mølgaardimit AneMarie Ottosenimillu aallakaatinneqartartussaq tulliusassaaq. Taakku kulturimi pisut suullunniit, oqaasilerineq inuillu sammisassavaat.
Ualikkut Angajo Lennert-Sandgreen Erninnguaq Reimerilu peqatigalugit inuusuttuaqqat silarsuaannut Senior WoWowimut pulasassaagut.
Nipilersukkat tamatta radiutsinni
KNR Radio inuiaqatigiit radioraat, taamaammat kinguaariit tamarmik tusarnaagassaat nukittorsarneqassapput; meeqqanoortut, inuusuttunoortut, inersimasunoortut, utoqqarnoortullu. Taakku saniatigut nipilersukkanik atuineq ataqatigiissaagaanerulissaaq.
Aallakaatitassiat nutaat allat ukiaanerani saqqummiunneqassapput, taakkulu ilaagaat nutaarsiassat itisilerlugit aallakaatitassiaq toqqaannartoq pisunit aallaavilik.
Arfininngornermi sapaammilu qilaanaarutigisinnasanut ilaapput nalorsitsaarineq Nunarput Nalunngiliuk? aamma akunnerit marluk iluanni nipilersugassiarsuit silarsuaannit ilisimasaqarluartoq Per Rosing peqatigalugu aallakaatitassiaq.
KNR radiomi aallakaatitassiani amerlanerni, tusarnaartartut Facebookikkut, telefonikkut, SMS-ikkut mailukkullu peqataatinneqartassapput.
Nutaarsiassat inuiaqatigiinnilu pisut pillugit tusarnaartartut isumaat tusarusuppagut. Tusarnaartartunut attaveqarnerput oqaloqatigiinnerussaaq, KNR radiomi pisortaq Masaana Egede naggasiivoq.
Apeqqutissaqaruit paasissutissanilluunniit perusukkuit KNR Radiomi pisortaq Masaana Egede attavigisinnaavat ugguuna: info@knr.gl imaluunniit uunga sianerlutit +299 36 15 00.
