Radari nannunnianut iluaqutaassaaq
Ukiorpassuarni misilittagaqaraluarluni utoqqarnillu ilisimasalinnit ilinniartinneqarsimagaluarluni sikumi piniartilluni uloriarnartut sumiinneri nalunartarput.
Ingammik massakkut silap pissusaata allanngoriartornerata kingunerisaanik sila ilaannikkut pisarnermit allaanerujussuusartoq.
George Angohiatok Iqaluktuttiami piniartuusoq CBC Newsimut oqarpoq siku ulorianartorujussuanngorsinnaasoq sikullunnerpaanilu angalaneq benziinatornaqalunilu piffissaajaataasaqisoq.
Massakkulli Sikut pillugit Victoria Universitymi Misissuiviup aamma Nunavut qeqqani piniartut Iqaluktuttiamiut Kugluktormiullu akornanni suleqatigiinneq aallartippoq.
Becky Segal, ilisimatusarfimmi tassani Sikut pillugit Misissuivimmi ilisimatuussutsikkut misissuisoq, piniartunik suleqateqarluni nunap assilioriaatsimik nutaamik ineriartortitsivoq, tassanilu radari iluaqutigalugu assilisat tunngaviupput piniartullu ilisimasaat ilaatinneqarlutik.
Radari iluaqutigalugu nunap assingi Iqaluktuttiap Facebookikkut quppernerani takuneqarsinnaapput piniartunillu nunaqarfinnit taakkunannga marlunneersunit piniarniarlutik angalanissamik pilersarusiornerannut atorneqalereerlutik.
