Radareqarfiit takornarianut ussassaarutitut
Amerikamiut sermersuarmi radareqarfigisimasaat takornarianut ussassaarutigineqarsinnaapput.
Taama Avatangiisinut Pinngortitamullu Pisortaqarfik Inatsisartunut ilaasortamut Demokraatineersumut Palle Christiansenimut akissuteqarluni allappoq.
Taassuma pisortaqarfik aperisimavaa radareqarfiusimasut kia piginerai saliinerlu qanoq ingerlanersoq paasiniarlugu.
Avatangiisinut Pinngortitamullu pisortaqarfik allappoq Inuutissarsiornermut, Nunalerinermut Sulisoqarnermullu pisortaqarfiusimasup radareqarfiit marluusut takornarianut ornittagassanngortinneqarsinnaanerat piukkunnaateqartutut nalilersimagaat.
Aammattaarli oqaatigaat annertuumik saliisoqarnissaa aalajangersimasumillu takuniarneqartarnissaat pisariaqassasoq, radareqarfiusimasut angalasunit iserfigineqarsinnaassappata.
Radareqarfiusimasut ilisimatusarnermut atorneqarsinnaanngitsut aamma oqaatigineqarpoq. Tassa avinngarusimavallaartumi inissisimagamik, soorlu sermersuarmi qillerilluni ilisimatusarfiusunut ungasippallaarlutik.
Radareqarfiusimasut sisamaagaluarput, marlulli salinneqareersimallutik. Sinneruttut marluk, sermersuarmiittut, Amerikamiut saliinerminnut ilanngukkumasimanngilaat, tamannagooq akisuallaassaqimmat aamma inunnik navianartorsiortitsisuunngimmata.
Immikkut ilisimasallit oqaatigaat radareqarfiusimasut ukiut 30-t 50-illuunniit ingerlanerini sermersuarmut morsukkumaartut ukiullu 10.000-it qaangiuppata aatsaat nueqqissinnaajumaartut.
