Kilisaatip Nanoq Trawl-ip maannakkut Hanstholmimiittup, raajartani ualeru tigoqqissinnaalissavai.
Nanoq Trawl ataasinngormalli ulloq unnuarlu nakkutigineqarluni politiinit misissuiffigineqarpoq.
Raajat 400 tonsit ippassaq ualikkut usingiarneqarput, kilisaammillu piginnittut, Polar Seafood-ip raajartatik maanna tunisinnaalerpaat, taama oqarpoq Polar Seafood-ip siulersuisuini siulittaasoq, Kjeld Holmstrup.
Bagmandspolitiit Kalaallit Nunaata politimesterianit Steen Thomsenimit ingerlanneqartumik misissuisimanerat taassuma aamma ajoriffissaqartinnginnerarpaa.
Kjeld Holmstrup naapertorlugu, politiit ilisimatitsissutigisimavaat, misissuinermi inernerit sapaatip-akunnerani tullermi saqqummiunneqarsinnaalissasut. Kjeld Holmstrupillu ilimagaa pingasunngornermi sisamanngornermiluunniit tamanna pisinnaassasoq.
Kilisaat Nanoq Trawl, suliarineqartussaanini pissutigalugu amutittussaavoq.