Raajat akii pillugit isumaqatigiinniarnerit isasoorput – akerlianilli KNAPK aamma Royal Greenland isumaqatigiipput inuussutissarsiutit taamaannerat iliuuseqarfigineqartariaqartoq.
Illuatungeriit ataatsimoortumik tusagassiuutitigut nalunaarumminni tamanna nalunaarutigaat.
Tassamo atuarneqarsinnaavoq tunisinermi akit pillugit isumaqatigiinniarnerit unitsinneqartut – isumaqatigiinniarnerit nangeqqinneqassanersut nalunaarutigineqanngilaq.
Maannamut akigitinneqartut pillugit isumaqatigiinnginneq taama annertutigitillugu Royal Greenland aamma KNAPK isumaqatigiissutigaat raajarniarnermi isertitat ikippallaartartut – aalisartunut aammalu tunisassiortunut.
Tamanna pillugu illuatungeriit ataatsimut suleqatigiissitaliorput sinerissamut qanittumi raajarniarnermi nutaamik periaaseqalernissamik siunnersuusiortussamik.
Suleqatigiissitap ilaatigut iluanaaruteqartarnerup qanoq aalaakkaasunngortinneqarnissaa – aammalu sinerissamut qanittumi raajarniarneq qanoq pitsanngorsarneqassanersoq misissussavai.