Raajartassiissutit naggueqatigiit inuit ikiussagai
Canadami aalisarnermut ministerip Dominic Leblancip Canadap kangisinnerusortaata avannaatungaata imartaani raajartassiissutit nutaat sapaatip akunnerani kingullermi saqqummiuppai, tassani pineqarlutik Baffinip qeqertaani Labradorimi New Foundlandimilu raajartassat.
Aalisariutinut piginneqatigiiffinnullu raajartassanik pisasseeriaaseq ukiuni kingullerni 20-ini atorneqartarsimavoq, tassalu paggatasiissarneq atorneqartarsimalluni.
Tamatuma kinguneraa aalisartitseqatigiit nutaat raajartassiissutit appassappata pisassinneqanngitsoornerat, aalisariutaatillillu pisoqaanerit kujataaneersuugajuttut pisassinneqartarlutik.
Maannali ministerip nalunaarutigaa, agguaasarnerup atsikkutigiissaartumik ingerlanneqartalernissaa, Nunavumi nunamik piginnittussaanermut isumaqatigiissummut naapertuuttumik, naggueqatigiillu Inuit allallu sineriammut qanittumiittut aningaasarsiornerat eqqarsaatigineqarlutik.
Ministeri ilanngullugu oqarpoq raajat pisassiissutigineqartut ikiliartortillugit nungusaataanngitsumik pisassiisarnissaq anguniarlugu sapaatit akunnerini tulliuttuni siunnersiuisarnini ingerlatiinnarniarlugit.
