Raajartassiissutit ikilineqanngillat
Raajartassiissutigineqartut 127.300 tonsiupput, naak biologit 110.000-inik raajartassiinissaq innersuussutigigaluaraat. 123.300 tonsit kalaallit raajarniartuinut pisassiissutigineqarput, avataasiortunut 70.281 tonsit pisassiissutigineqarlutik kiisalu 53.019 tonsit sinerissap qanittuani raajarniartunut pisassiissutigineqarlutik kiisalu 4.000 tonsit EU-mut pisassiissutigineqarput. Taamaalilluni raajartassiissutigineqartut 5 procentimik ikileriartinneqarput. Tunumi raajartassiissutigineqartut allannguuteqanngillat.
Qaleralittassiissutigineqartuni biologit innersuussutaat malinneqarput, taamaalilluni Qeqertarsuup Tunuani 12.500 tonsit qaleralittassiissutigineqarput. Upernavimmi 5.500 tonsinik qaleralittassiisoqarpoq, Uummannamilu 5.000 tonsit qaleralittassiissutigineqarlutik.
Saattuarniarnermi pisassiissutit 2007-imut naleqqiullugit 8,7 procentinik ikinnerussapput. Katillugit 4.000 tonsinik saattuartassiisoqarpoq. Taakkua biologit innersuussutaasa amerlaqatigiinnangajappaat. Taamaattorli marsimit juulimut saattuarniartoqarnissaa Pinngortitaleriffiup innersuussutigigaluaraa Naalakkersuisut saattuarniartut namminneq piffissamik aalajangiisarnissaat aalajangiuppaat.
Naalakkersuisut saarullinnut suluppaakkanullu pisassiissutissanik suli aalajangersaanngillat. 2008-mut pisassiissutit Namminersornerullutik Oqartussat nittartagaanni nanoq.gl-imi atuarneqarsinnaapput.
