Raajarniat aalisaannarnissaat ataatsimiititaliap sulissutigaa

- Sinerissamut qanittumi raajartassat qaammat ataaseq qaangiuppat nungussimanissat ilimanarpoq. Nunguppatalu aalisartut tunisassiorfiinilu sulisut suliffissaaleqilissapput, Aalisarnermut ataatsimiititaliap siulittaasua, Jonathan Motzfeldt oqarpoq.

- Aalisarnermut naalakkersuisoq ullaaq manna ataatsimeeqatigigatsigu paasivarput, sinerissap qanittuani raajartassat sinneri qaammatip iluitsup iluani aalisarneqarsinnaasut. Pisassat nunguppata, suliffissaqarniarnissaq aammalu raajarniallu aalisaannarnissaat eqqarsaatigalugu qanoq iliuusaasinnaasut misissorlugit aallartinneqareerput, Jonathan Motzfeldt oqarpoq.

Inatsisartut ullumi ataatsimeereerpata ukiakkut ataatsimiinneq unikkallassaaq, Inatsisartullu novembarip sisamaanni katersuuteqqinnissaannut siunnersuummik qanoq ikkumaarnersumik saqqummiussisoqassasoq, Jonathan Motzfeldtip naatsorsuutigaa. Tamatuma tungaanut partiit isumaqatigiinniassasut naatsorsuutigineqarpoq.

- Tassa Avataasiortut raajartassaatik ukiup naanissaanut nungussinnaanngippatigit, sinerissap qanittuani raajarniartunut nuussisinnaaneq misissorneqassaaq. Novembari qiteqqutsinnagu, inatsimmut allannguutissamik imaluunniit aaqqissuussinermik allamik takkuttoqarpat, ataatsimiititaliami suliarissallugu piareersimavugut,

Aalisarnermut ataatsimiititaliami siulittaasoq, Jonathan Motzfeldt, oqarpoq.