Raajarniarnermut MSC-mik allagartaq 2023-mut sivitsorneqartoq

MSC-p Londonimi qitiusumik allattoqarfianit akuersissuteqarput. Kitaani raajarniarnermut annerusumik misissuereerlutik ukiunut tulliuttunut tallimanut, tassalu 2023-p tungaanut nutaamik allagartamik tunniussinissamut akuersissuteqartut, allattoqarfimmit nalunaartut, Sustainable Fisheries Greenlandip SFG-p siulittaasua, Lisbeth Due Schönemann-Paul oqarpoq.

Nunatsinni raajarniarneq nunatsinni nungusaataanngitsumik aalisarnermik uppernarsaammik MSC-mit siullersaalluni 2013-imi allagartartaarpoq.

Allagartat taama ittut ukiuni tallimani atuuttarput, taammaammallu raajarniarneq nutaamik allagartartaassanersoq ukioq manna aalajangerneqartussaalluni.

Raajarniarnerup nutaamik annerusumik naliliiffigineqarnera allagartartaaqqinnermut ilaasoq, SFG allappoq.

Tusarniaanerilli naliliinerillu tamarmik naammassineqarsimasut, taamaalillunilu ukiunut tulliuttunut tallimanut allagartartaartitsisinnaanngorlutik Londonimi MSC-p marlunngormat nalunaarutigaa.

Aamma Barentshavetimi saarullinniarneq, misaqqarnarniarneq saarulliusarniarneq, nunatta kitaani nipisanniarneq kitaatalu avataani qaleralinniarneq MSC-mik allagartartaarput.

MSC-millu allagartartaartarnissaq ilungersuutigiinnarneqartariaqartoq, Lisbeth Due Schönemann-Paul oqarpoq.

- Kingullertigut nungusaataanngitsumik aalisarnissamut niuerfiit piumasaqaataat malunnaatilimmik sakkortusiartorput. Taamaalillutik Asiami niuerfissuit aalisakkanit qalerualinnillu tunisassiat MSC-mik nalunaaqutsersimanissaannik piumasaqaataat sakkortusiartuinnarput, taamaattumik nalilerneqarpoq, tunisatta akigisasaartillugit tunisarnissaat qulakkiissagutsigu, pimasaqaatinik tamakkuninnga malinnittariaqartugut, Lisbeth Due Schönemann-Paul oqarpoq.