Qungujullusi - akeqanngilaq

Innuttaasut peqqissusaannik misissuineq 2005-miit 2010-mut ingerlanneqarmat nakorsiat peqqinnissaqarfimmit sullinneqarnertik pillugu aamma isummersortinneqarput. Professor Peter Bjerregaard misissuinermik ingerlatsisoq isumaqarpoq ajornartorsiutit ilaat iluarsineqarsinnaasut immikkut aningaasaliinngikkaluarluni.

- Nakorsiat ilaat isumaqarput sulisut inussiarniippallaartut. Tamanna akeqanngitsumik iluarsineqarsinnaavoq. Taamatuttaaq aamma ippoq pitsaanerusumik nakorsiat ilisimatinneqartarnissaat, Peter Bjerregaard KNR-imut oqarpoq.

Innuttaasut peqqissusaannik misissuinermi apersorneqartut 13 procentii isumaqarput sulisut nakorsianut pissusilersornerat pitsaanerusinnaagaluartoq.

Nakorsiat ilaat isumaqarput sulisut ilaat saaffigineqaraangamik paasissutissanik mianersuussinerusinnaasut. Mianersuussinngineq nipangiussisussaatitaanermut ajornartorsiutaasinnaasoq, nakorsiat ilaat isumaqarput.

Tamatigut nakorsaq nutaaq
Nakorsiat ilaasa naammaginngisaannut ilaavoq nakorsanit sullinneqarneq. Nakorsiat uparuarpaat nakorsiarnerit tamaasa nakorsamut nutaamut innersuunneqartarneq.

- Kisianni sulisut taarseraannerat nakorsat akornanni taamaallaat ajornartorsiutaanngilaq. Sulisuni tamani taarseraanneq suli annertuallaarpoq, Peter Bjerregaard oqarpoq.

Sulisullu taarseraannerat pissutaalluni paasissutissanik apuussisarneq tusiapillaalersinnaasoq suli peqqinnissaqarfiup ukiorpassuarni ajornartorsiutigigallartussaassavaa.

- Nakorsiat ilaannit oqalutsit isornartorsiorneqarput. Aammami nalunarsinnaavoq nakorsiarnermi oqaluttaaniarneq qallunaatut kalaallisullu oqalorikkaluaraanniluunniit. Ilimagisariaqarparput nutserussisarneq pissutigalugu paasissutissat ilaat annaaneqartarsimassasut, oqalutsimmi pikkorinnerusortaqarlutillu pikkorippallaannginnerusortaqartarput, Peter Bjerregaard oqarpoq.

- Kisianni tassa oqalutseqarneq atortuartariaqarparput nakorsat kalaallit naammattut pigilernissaasa tungaanut. Ukiorpassuilli atorlugit tamanna anguniarneqartussaassaaq, Peter Bjerregaard oqarpoq.

Maluginiarpaali aamma peqqinnissaqarfiup sullissineranik naammagisimaarinnittut amerliartormata.

- Tamanna imaasiallaannarlugu nassuiaatissaqartinngilara. Kisianni tassa ilimagisariaqarparput 1993-mi innuttaasut peqqissusaannik misissuinermiit peqqinnissaqarfik ingerlalluarnerulersimasoq, Peter Bjerregaard oqarpoq.

Pilersaarutaavoq innuttaasut peqqissusaannik misissuineq nutaaq 2014-mi ingerlanneqassasoq.