Qummoroortartut 600.000 koruunitut naleqartut unnuaq tillinneqartut
Katersortarfiup qummoroortartuutai marlunngorneq nal. unnukkut arfineq marluk pingasunngornerlu ullaakkut qulingiluat akornanni tillinneqarsimasut, Nuummi katersortarfiup ulluinnarni aqutsisua Gunnar Petersen oqarpoq.
- Marlunngornermi unnukkut taakaniikkama allanartoqanngilaq, Gunnar KNR-imut oqarpoq.
Containeri Nuummi Qinngorpumiittoq pingasunngornermi ullaakkut alakkaqqippaa, tassanilu paasivaa karsit minnerpaamik hunnorujut qummoroortartunik imaqartut tillinneqarsimasut. Gunnar Petersen naapertorlugu, ukiortaamut qummoroortitassat tillinneqartut 600.000 koruuninik naleqarput.
- Neriuppugut sillimasiinermik taaserneqarsinnaassasut. Tamanna paasiniassavarput, Gunnar oqarpoq.
Tillinniartoqarnera politiinut unnerluutigineqareerpoq. Gunnar Petersenillu qummoroortartut tillitat Facebookikkut aamma ujaarai. Inuit ukiortaamut qummoroortartussanik akikitsunik tuniniaasoqarnissaanut marseqqullugit kajumissaarpai.