Qullissanit qimagutsitaanikuuneq misigisanik nuannersunik taarseneqassaaq
Qullissat inuerutitinneqarmalli ukiut 45-t maannamut qaangiussimalerput. Tamannalumi Nunatta oqaluttuarisaanerani puigorneqanngisaannassagunarpoq.
Qullissat.
Allattoq Ane-Marie Petersen
juulip 08-at 2017 15:41
1972-imi aasarisseruttoraa Qullissarmiut illoqarfinnut allanut nooqqusaallutik illoqarfigisartik qimattussanngorpaat.
- Sila alianaattorsuusoq qatsungasorsuullunilu taamanikkut eqqaamaniarpara, Thorkild Jeremiassenip, taamani 21-nik ukioqarluni Qullissat qimalernera eqqaamasalikkersaarutigaa.
Thorkildip ikinngutigilluagaa Jonas Fleischer, Jonasinnguatut ilisarisimaneqartup, Aasiammiunngoreerluni angajoqqaami Qullissanit tikilerlutik niuffiornerini misigisani puiukkiussimavai.
- Niuffioratta oqimaaqaaq, takusinnaagatsigit utoqqartannguagut pramimit niujartortut qullililllutillu, Jonas Fleischer oqaluttuarpoq.
Naak aasaq taanna ilaqutariippassuarnut pisoq alianarsimagaluartoq Qullissarmiuusimasut aasaanerani ukiut tamaasa Qullissani aasarsioqatigiittarput. Inuttummi alloriaqqinnissaq pisariaqartoq, qullissarmiuusimasup oqaatigaa:
- Ukiut 40-t aliasunnerput tassa tassunga killeqartariaqarpoq. Ukiut 40-ninngaanniik qummut ukit 50-t tungaannut nuannersumik aasarsioqatigiinneq taakani ingerlattarumallugu aalajangiussimavarput, Qullissat Ikinngutaanni ukiuni 27-nngortuni maannamut siulittaasuusoq, Thorkild Jeremiassen oqarpoq
Ukioq mannalu naapeqatigiinnissaq immikkut malunnartinneqassaaq, ukiummi 45-runngorput Qullissat inuerummalli.
Qullissani katerinnissaq sapaatiuppamit aallartittussaavoq, aaqqissuussinerlu pisarnermit annertunerussasoq aasarsioqatigiinnissami ataqatigiissaarisup Dorthe Løvstrøm Mathiesenip oqaatigaa.
- Qullissarmiut tikisitagut unnukkut appisimaassapput. Pele Møller band, Qulleq, Zednamik aallarniisut Isak Møller panini ilagalugu Maalia Juunalu, Nathan peqatigalugu sila ajunngippa silami appisimaassapput. Sila ajussappat katersortarfimmiissaagut, Dorthe Løvstrøm Mathiesen oqarpoq.
Qullissani aasarsioqatigiinnissaq juulip ulluisa qulingiluaannit 14-iata tungaanut ingerlanneqassaaq. Angoqqaanniuutitsinerit, igaasarnerit, naalagiaqatigiinerit arsaannerillu ilaatigut peqataaffigineqarsinnaajumaarlutik.
