'Qullissara'-mut billetit nungupput
Nipilersuutigaluni isiginnaagassiap 'Qullissara'p unnugu Nuummi takutinnissaanut billetit tamarmik tunineqarput aammalu ilimanarluinnarluni aqagu ualikkut takutinneqarnissaanut billetit tamakkerneqarumaartut.
Allattoq Noah Mølgaard
Nipilersuutigaluni isiginnaagassiaq 'Qullisara' Katuami inersuarmi unnugu takutinneqassaaq. Maanna Nunatta isiginnaartitsivia nalunaarpoq billetit tamarmik tunineqareersut
Kingullermik tallimanngormat 'Qullissara' Tasiilami iluatsilluartumik takutinneqarpoq. Maannalu Nuummi takutinneqarnissaata iluatsilluarnissaa ilimanarluinnarpoq.
'Qullissara' suliarineqarsimavoq isiginnaagassiat naatsut Qullissani eqqaamasanik tunngavillit tunulequtaralugit. Taakkulu akunniuliuttarlugit Vajgatip qitigiai nipilersorneqarput.
Vajgatip qitigiai nutaamik aaqqissuullugit nipilersortartup Christian Søgaardip suliarisimavai.