Qulimiguullip timmisartuaqqamik ujaasisussap sila qatsorsiivaa
Timmisartuaraq Islandimi illoqarfimmit Keflavikimiit Kulusummut ingerlaartoq, sisamanngormalli tammaaneqartoq suli nassaarineqanngilaq.
Allattoq Apollo Jeremiassen
Qulimiguulik S-61, ujaasinermi atorneqartoq silagisseriarpat aallaqqissasoq nalunaarutigineqarpoq. Timmisartoq alla sakkutuunit pigineqartoq, maannamut ujaaseqataasoq allamik suliassaqartinneqalersoq ujaaseqataajunnaassasoq aamma nalunaarutigineqarluni.
Timmisartuaraq tammaaneqartoq, Kulusuup eqqaani kingullermik takuneqarpoq, ujaasinerlu Kulusuup eqqaani maannamut ingerlanneqarsimalluni. Ujaasinermi ujaasiffik maanna annertusitinneqassasoq nalunaarutigineqarpoq.
Timmisartuaqqami aquttup kinaanera, suiaassusaa, qassinik ukioqarnera aamma sumiuunera oqartussanit maannamut suli ilisimatitsissutigineqanngilaq.