Qulimiguullip atortuisa ilaat aseroraluartut

Qulimiguulik sulisunik Qeqertarsuup Kitaatungaani qillerivimmukaassuinernut, ujaasinernut ajutoortoqassagaluarpallu annaassiniarnernut quliguulik taanna atorneqartaraluarpoq.

Pilersaarutit tamarmik ajunngitsumik ingerlassappata, Cougar Helicopters-ikkut qulimiguuliutaat, S-92, ullumimiit kingumut atoqqilissaaq.

S-92-ip atortuisa ilaat sapaatip akunnerata kingulliup siuliani aseroraluarput. Cairn Energymi sulisut arlallit Qeqertarsuup avataani uuliasiorfimmut Stena Donimut assartorneqareersullu qulimiguullip atortuisa ilaat aserorput. Qulimiguulik Stena Donimit orsersorniartillugu ajutoortoqarpoq, Skotlandimi aviisimi, The Telegraphimi, tamanna allaaserineqarpoq.

Qulimiguulik Cairn Energyp orsersortarfianut attavilerneqarmat qulimiguullip orsersortarfia kissatsippallaarpoq.

Cougar Helicoptersip qulimiguuliutaasa Nunatsinni sulineranni pisortaq, Hank Williams, erseqqissaavoq, qulimiguullip orsersortarfia uuliakuunngitsoq. Ajoqusernerli ima annertutigaluni qulimiguulik atorunnaarsinneqartariaqarallarluni.

Qulimiguulik tamatuma kingorna angallammut ikillugu nunamukaanneqarpoq.

- Umiarsuup qaavaniit timmissussinnaagaluarparput, misissorneqaqqaartinnaguli taamaaliorsinnaanngilagut, Hank Williams aviisimut The Telgramimut erseqqissaavoq.

Cougar Helikopters canadamiunit pigineqarpoq. Cairn Energy oktobarip tungaanut taakku isumaqatigiissuteqarfigisimavaat. Sulisut Siggummut assartortassavaat, ujaasisoqassappat annaassiniartoqassappallu aamma ikiuuttassallutik.