Qulimiguulinnik pisariaqartitsineq misissorneqartussanngorpoq

Issittumi upangalungaarsimanissaq pillugu isumaqatigiissummut SAR-imut atatillugu Kalaallit Nunaata qulimiguulinnik pisariaqartitsinera pillugu suleqatigiit qulaajaasussat sulinermi toqqammavissaat pillugu allakkiaq Attaveqarnermut Naalakkersuisumit, Jens B. Frederiksenimit aamma Danmarkimi illersornissamut ministerimit, Gitte Lillelund Bechimit ippassaq atsiorneqarpoq.
Assi © : Branding Greenland
Allattoq Gedion Storch
maajip 17-at 2011 16:10

Pilersaarutaavoq maannakkut atugaasut S-61-it Air Greenlandimit pigineqartut atorunnaarneqassasut kingusinnerpaamillu 2012-imi aasartinnagu nutaanik tarserneqareersimassallutik.

- Piumasaqaateqartariaqarpugut tassami qulimiguullit annaassiniarnerni atugassat kingoraartissaat sungiusarnerillu ilanngullugit 390 millionit koruunit missaannik akeqartussaammata, Air Greenlandip pisortaanera, Michael Binzer Ritzauimut oqarpoq.

Kisiannili Danmarkimi illersornissamut ministeri, Gitte Lillelund Bech isumaqarpoq, Kalaallit Nunaanni qulimiguulinnik annaassiniutinik peqarnissa oqaluuserineqartariaqartoq.

- Tamanna qanoq ililluni qulakkeerneqarsinnaanersoq pingaarnersaavoq,  upalungaarsimanermi SAR-imi qulimiguullip eqqortup atorneqarnissaa oqaloqatigiissutigissallugu, aningaasaqarnerlu qanoq ittuunersoq upalungaarsimanermullu SAR-mut qanoq naapertuutsiginersoq, ilaatigut Danmarkimi  sakkutooqarneq aamma peqataammata. Illersornissamut ministeri oqarpoq.

Air Greenlandimi pisortaaneq, Michael Binzer, upalungaarsimanissamut nutaamut peqataarusuppoq, kisiannili ungasinnerusoq isigalugu suliffeqarfimmik isumaqatigiissummik atsioqateqartoqarnissaa pisariaqarnerarlugu, naalakkersuinikkut isumaqatigiissutigineqanngippat.

Upalungaarsimanissaq pillugu isumaqatigiissutip issittumi nunat allat peqatigalugit Issittumi Siunnersuisoqatigiit atsioreermassuk, maanna nunanut allanut politikkimi pissaaneqarniunneq aallartittoq, illersornissamut ministerimit qularutigineqanngilaq.

- Kalaallit Nunaanni upalungaarsimanissamik SAR-imik peqartariaqarnissamut suliarujussuup una ilaminiinnannguaraa. Isumaqatigiissut sapaatip akunnera kingulleq Issittumi Siunnersuisoqatigiinnit isumaqatigiissutigineqartoq aammattaaq nunanik allanik suleqateqarnissamut tunngassuteqarpoq, tassalu taanna uanga, Jens B. Frederiksenillu suliakkiinissamik atsiugarput annikitsuinnannguuvoq, nunarsuarmioqataaneq eqqarsaatigalugu. Illersornissamut ministeri Gitte Lillelund Bech taama naggasiivoq.

Aamma atuaruk