Qulimiguulimmi aquttoq tammartajaartoq

Nanortalimmiit Aappilattunut helikoptereeqqamik ingerlaarneq minutsit 20-t missaannik sivisussuseqartartoq akunneq ataaseq sinnerlugu ingerlaarneqarpoq, qulimiguullip aquttua tammartajaarluni nunap assinga misissorniarlugu maanngaannaq mittariaqalermat. Ilaasut ilaat Erninnguaq Semsen ima oqaluttuarpoq.

”Qangattaratta tupigivara kujammut pinnani avannamut aallaratta, Nalunaq qulaallugu Tasermiut aamma qulaallugu, isumaqarpunga Kangerlukkooriartulerluta.

Qaqqat portoqisut akornatigoorluta nuna ilisarilerpara Kangikitsup timaaniilluta, Aappilattoq kangimut qaangerlugu kangerluup qinnguani.

Aamma tassa sangugatta Kangersunermi sermersuup tungaanukariarluta uterluta aallarpugut, tassalu Nanortallup Aappilattullu akunnikanniani Tasermiunut milluta.

Aquttup nunap assinga misissulermagu aatsaat pasittalerpugut tammartajaartoq.

Nunap assingani sumiinnerluta tikkuupparput sumukarfissarpullu takutillugu.

Anorlermat qaqqarsuillu 2200 meterit missaani portutigisut akornatigut qullarujussuartarluta pigatta aarlerinaqaaq, tikikkatta ilarput meriarpoq.”

Erninnguaq Semsen oqaluttuarpoq.

Air Greenlandip pisoq suli misissuiffigaa.