Qulimiguulik atorlugu ujarlertoqalerpoq

Vivi Inger Kristiansenip ulluni aqqaneq-marlunni maanna periarfeerunneqartup ujaarineqarnerani inuit arlallit killisiorneqarput, qimmillu atorlugit ujarlertoqarluni, kinguneqanngitsumilli.

Taamaammat qulimiguulik atorlugu ujarlertoqalerluni. DAGBLADET Ringsted taama allaaserinnippoq.

- Periarfissaasinnaasut tamaasa atorlugit sulivugut. Ilisimasagut taakkuinnaagallartillugit periarfissat tamaasa atorpavut, Johnny Nilsson, Ringstedip politiivineersoq DAGBLADET-imut oqarpoq.

Qimmit atorlugit sapaatip-akunnerata naanerani ujaasisoqarpoq, aamma kinguneqanngitsumik.

- Suli Ringstedip avataani ujarlinngilagut, Vivi Inger Kristiansenilli ilagisartagai killisiorpagut, annerusumilli paasisaqannginnatta qanoq pisoqarsimasinnaanissaa eqqoriaannarsinnaavarput. Vivi Inger Kristiansen ajutoorsimasinnaavoq, pinerluttuliortoqarsimanissaalu aamma eqqoriarneqarsinnaalluni, Johnny Nilsson oqarpoq.

Pilersaarutilli naapertorlugit qulimiguulimmik ujaasisoqalerpoq, qaqugorpiarli qulimiguulimmik ujaasisoqalissanersoq suli oqaatigineqarsinnaanngitsoq Ringstedimi politiinit oqaatigineqarpoq, silap erseqqarinnerulernissaa utaqqimaaqqaarniaramikku.

Vivi Inger Kristiansen najugaqarfimminit Ringstedimiittumit juulip qulingiluaanili tammaaneqarpoq. Taamanili arnaata panini tammaallugu nalunaarutigimmaguli ujarneqalerpoq. Arnaata oqaatigaa panini siornatigut tammaanngisaannarsimagaluarlugu.