Qulimiguulik ajornartorsiorluni mippoq

Nutarterneqarpoq 10-11-10 nalunaaqutaq 15:09

Qulimiguulimmut ilaasut ilaat, Lars Motzfeldt, ima oqaluttuarpoq:

- Qulimiguulimmik Narsarsuarmit Narsamut ingerlaartilluta Narsap eqqaatigut timmitilluta tassanngaannartumik appariarujussuarpugut.Tamatuma kingorna kalerinneqarpugut qulimiguumik teknikkikkut ajornartorsiuteqarmat Narsarsuarmut utertariaqartoq. Qulimiguulik Narsarsuarmut pukkitsukkut ingerlaartilluni sangujoraallatsiarpoq, taama Lars Motzfeldt KNR-imut oqaluttuarpoq.

- Narsarsuarmut mikkatta qulimiguulik sakkortuumik mippoq, minniarnerminilu tammissarluni, qulimiguulimmut ilaasoq oqaluttuarpoq.

Helikopterip Narsarsuarmut minnerata kingorna ilaasut qulimiguullip naalagaaniit paasitinneqarput qulimiguullip motoriata aappaa kissappallaaleraluarsimammat qaminneqarsimasoq, taannalu pissutigalugu ataasiinnarmik motoreqarluni mittariaqarsimasoq, sakkortuumillu minneranut tamanna aamma pissutaasimasoq.

Air Greenlandimiit Christian Kjeldsenip uppernarsarpaa S-61-eq ullumi Narsarsuarmut utertariaqarsimasoq.

- Motorip aappaata uunnappallaarnera pissutigalugu, timmisartumi naalakkap iliuusissani najoqqutaralugu motori qamissimavaa, ataasiinnarmillu motoreqarluni ingerlaqqissimalluni. Ataasiinnarmillu motoreqarnerup kinguneranik sakkortuumik mittariaqarsimavoq, Christian Kjeldsen nassuiaavoq.

Taassuma erseqqissaatigaa ilaasunik ajutoortoqarsimanngitsoq, isumannaallisaanermilu malitassat tamarmik malinneqarsimasut.