Qulimiguuleeqqap akornuteqarnerata Qeqertarsuup Tunuani angallanneq unitsikkaa
Qulimiguuleeraq Ilulissani uninngavoq kingoraartissamillu Canadameersumik utaqqiinnarluni.
Angalasut 60-it tungaannoortut qulimiguuleeqqap akornuteqarneranik eqqugaapput, taakkulu Ilulissanit Aasianniillu ingerlaqqissinnaanngikkallarlutik.
Ulluni arfineq-pingasuni ingerlaqqissinnaasimanngitsoq
Angut inuusuttoq Nuummit Qasigiannguanut decembarip qulingani aallartoq Qasigiannguanut suli apuussimanngilaq. Taanna angalasorpassuit allat assingalugit Ilulissanit ingerlaqqissinnaasimanngilaq, maannamullu ulluni arfineq-pingasuni utaqqisariaqarsimalluni.
Air Greenlandip qulimiguuleerataa Bell 212 ataasinngormat angalajunnaartoq kingoraartissanik Canadameersunik utaqqisinneqarpoq.