Qulaajarneqartut pigaluttuinnarput
![](/sites/default/files/styles/image_934x467/public/article_images/stannes2.jpg?itok=NTUCYD_8)
Maannalu qulaajarneqartut pigaluttuinnalerput. Tamatumuuna atuarfik nerisaqarfiullunilu ineqarfiusoq, St. Anne’s, nunap immikkoortuani Ontariomi Fort James Bayip eqqannguani Albanynimiittoq pillugu. Atuarfik taanna ilagiit katuullit Canadami naalakkersuisut peqatigalugit ingerlatarisimavaat.
Atuarfik nerisaqarfiullunilu ineqarfiusoq, 1990-kkunni naalliutsitsisoqartarsimaneranik tusatsiakkat pissutigalugit,politiinit ukiuni kingullerni tallimani misissuiffigineqarpoq. Allagaatit misissuinermut tassunga tunngasut Naalakkersuisunit isertuunneqarsimapput, indianerilli saqqummiunneqarnissaat maanna piumasaraat susoqarsimanersoq kikkunnit tamanit paasineqaqqullugu aammalu naalliutsitaasarsimasut taarsiiffigineqarnissaat siunertaralugu.
Politiit misissuinerminni paasisaasa ilagaat, indianerit meerartaat kinguaassiutitigut atornerlunneqartarsimasut, pinngitsaalillugit meriaaminnik nerisinneqartarsimasut aammalu issiavimmi innaallagialimmi nammineq sanaajusumi qupinnguallatsittarlugit naalliutsinneqartarsimasut.
Atuarfimmi nerisaqarfiullunilu ineqarfiutigisumi sulisut tallimat pillagassanngorlugit pineqaatissinneqarsimapput.
Indianeri, Edmund Metatawabin, Fort Albanymeersoq, CTV NEWS-imut oqaluttuarpoq meeraalluni marlorialuni issiavimmi innaallagialimmi naalliutsinneqarsimalluni. Taanna maanna 65-inik ukioqarpoq allagaatillu piffissaagallartillugu saqqummiunneqarnissaat ilungersuutigalugu.