Ole Møller: Qujavunga inuiaqatigiinnut kalaallinut
- Qujavunga nunamut inuiaqatigiinnullu kalaallinut. Assorujussuaq tuppallernaqaasi taama annertutigisumik ikiuukkassi, Nuugaatsiameersoq maannalu Uummannamiittoq, Ole Møller, oqarpoq.
Nuugaatsiaq tassaarsuarmit juunip 17-ani eqqugaavoq. Inuit sisamat tammaaneqarput, taakkunannga Ole Møllerip ernera, ukuaa ernutaalu tammaaneqalerlutik.
AAMMA ATUARUK Maqaasineqartut ujaarineqarnerat politiit taamaatiinnaraat
Ajunaarsimanissaallu ilimagineqartoq politiit sapaatit-akunnerata siuliani ilisimatitsissutigaat.
Taassuma saniatigut Ole Møllerip ernermi aappaa ikilertiterluni Dronning Ingridiup Peqqissaavissuanukaanneqarpoq. Pisorlu imaannaanngeqaaq.
- Ajunaarnersuup pinerani, soorunalimi pisut sakkortoqimmata, uagutsinnut eqqugaasunut annerusumik eqqaamannissinnaanerput tuparujussuarnerup piliaanik killeqarpoq.
Inuit kissalaarnermik takutitsisut
Uummannamullu qimagutitinneqarmata tamanit tapersersorneqaqaat. Inuit ullut tamaasa ilassiortut, pajuttortut kissalaarnermillu takutitsisut, Ole Møller oqarpoq.
Ilaqutariit nukissanikkiartulerput, ullorlu nalinginnaasumik ingerlaqqilernissaanut aqqut suli takeqaaq:
- Qaatungerput kusatsikkiartorpoq, qannali ilorput, uanga naliliinera naapertorlugu, piffissami avungangaatsiaq qatsunngikkallassooq. Kisianni nukippassuarnik tunisipput.
Ole Møllerikkut illortik pigisatillu tamaasa annaavaat.
Sungiunniagassat nutaat
Nunaqarfigisaminnullu uteqqissinnaanngikkallartillutik illoqarfimmi inooqataanissartik naatsorsuutigaat:
- Illoqarfimmiunut akulerunniarnissarput soorunami suliareqqaartariaqassuarput. Nunaqarfimmiuullunimi illoqarfimmiittorsuunanilu pissutsit allarluinnaat massakkut pulaffigaagut.
AAMMA ATUARUK Pipaluup anini, ukuaasani soralussanilu arfininngormat unnukkut annaavai
Ole Møllerip Nuugaatsiarmiut nunatsinnit nunattalu avataanit taama annertutigisumik ikiorneqarnerat tupaallaatigaa. Tarnip pissusaanik ilisimasallit immikkut aamma qujaffigisassaasut, taassuma oqaatigaa.
- Inuttut nakkaqqarujussuarnitsinni ikiuupput. Uanga tulluusimaarutigaara kalaallinik tarnip pissusaanik ilisimasalinnik taama pikkoritsigisunik peqalersimagatta. Inuttut assorujussuaq ilinniarfiupput, Nuugaatsiarmioq, Ole Møller, oqarpoq.
