Qujaukitsoq: Trump suniarnersoq naluarput

Amerikamiummi Donald Trump novembarimi qinissagaluarpassuk, Naalakkersuisut nalorninartorsiortussanngussapput.

- Donald Trump præsidentinngussagaluarpat, republikanerit qinigaaffimmi nutaami issittumut, silaannaap pissussaanut, sakkutooqarnikkut eqqissinermullu qanoq suleriaaseqarnissaat ilisimannginnatsigu, pissanganartorujussuarmik inissisimassuugut, Vittus Qujaukitsoq oqarpoq.

Republikanerit silap allanngoriartorneranik oqalunermut qangali nalornisuunerupput, Trumpilu oqareerpoq, sila pillugu Pariisimi siorna isumaqatigiissummut ilaanertik taamaatinniarlugu, avatangiisit pillugit malittarisassat nutaat atorunnaarsinniarlugit, taavalu aamarsuarnik uuliamillu isumalluuteqarnerulerusulluni.

Aamma atuaruk IA & D: Clinton nunatsinnut pitsaanerussaaq

Hillary nalunngilarput

Trumpilli ilimagineqanngikkaluartutut Obama avatangiisinut politikkia ingerlateqqissagaluarpaguluunniit, Hillary Clinton præsidentinngorpat pitsaanerpaassasoq, Vittus Qujaukitsup qularutiginngilaa.

- Nunatsinnut issittumullu suliassanik ilisimasaqarnera nunatsinnut iluaqutaasussaavoq, taamaattumik Demokratit qinigassanngortitaat præsidentinngussagaluarpat iluaqutissartaqarpoq.

Qinersisartunik misisssuinerit ameranersaasa maannakkorpiaq takutippaat, Clinton novembarimi ajugaassasoq, kisianni 5 procentpointiinnarnik siuaqqammat qinersinissamullu qaammatit suli pingasuummata, suli nalunartoqaqaaq.

Donald Trump tulliulluni USA-p præsidenterilissagaluarpagu, Vittus Qujaukitsoq naalakkersuisutigut attaveqatiginninnissamut ulapinnissamut piareeqqavoq.

- Takoqqaariartigu taamanikkussamut, qinersineq qanoq inerneqassanersoq. Kisianni taamaattoqassagaluarpat soorunami suliassaqalissaagut, aamma nunatta issittullu amerikamiut naalakkersuisuinit eqqumaffigineqarnissaat anguniarlugu suliniuteqassalluta.