Quiasaarisunut billetit paggatiinnarpaat
Billetit 508-ut tamarmik pisiarineqareerput Piitannguaq Alaufesenip Ilulissaneersup aamma Valerius Nielsenip Sisimiuneersup 'Aaseralaat'mik qulequtserlugu aliikkusersuinissaannut. Taamaattoq aliikkusersuinermi suut tusartinneqassanersut oqaluttuariumanngikkallaarpaat.
- Isissutissanik pisisimasut ataqqiniarlutit taamaasiorpugut. Taakku misigisariaqarput akiliutigisartik pissarsissutigilluarlugu, Valerius Nielsen KNR.gl-mut oqarpoq.
Aliikkusersuinerup aallartinnerani Piitannguaq Alaufesen aamma Valerius Nielsen immikkut aliikkusersuissapput unnuullu naalernerani ataatsimut takutitsissallutik.
- Ataatsimut takutitassarput nutaarluinnaavoq aqagu unnukkut siullerpaamik tamanut takutinneqartussaq, Valerius Nielsen oqarpoq.
Illoqarfinni assigiinngitsuni najugaqaraluarlutik isumassarsiartik oqarasuaatikkut oqaloqatigiittarnermikkut ineriartortissimavaat
- Aliikkusersuinissamut takoqqinnissatsinnullu qilanaaqaagut. Siorna Nanortalimmi aliikkusersueqatigiinnitta kingorna aliikkusersueqatigeeqqissimanngilagut, Valerius Nielsen oqarpoq.
Inersuarmili isiginnaartut illarratilillaraangata qanoq ililluni illarnaversaartoqartarpa?
- Isiginnaartitsinermik aallutaqarluni tamanna ilikkagassaavoq. Kisianni isiginnaartut qisuarnerat atorsinnaasarparput siumut pilersaarusioriigaanngitsumik ilaqartinneranut, Valerius Nielsen oqarpoq.
- Kisianni soorunami illartaqaagut quiasaarutissat ineriartortinnerisa nalaani, nassuerpoq.
Aliikkusersuineq 'Aaseralaat' sapaatip akunnera kingulleq tusaqqusaarutigineqalerpoq aliikkusersuinissarlu ullunik arlalinnik sioqqullugu billetit nungunneqarput.
- Inuppassuit saaffiginninnerat tunngavigalugu aalajangerpugut unnuk taanna marloriarlutik aliikkusersuissasut. Siullermik aliikkusersuissapput nalunaaqutaq arfineq pingasuniit qulingiluat tungaanut aappassaanillu qulip qeqqaniit aqqarnup qeqqata tungaanut, Katuami aaqqissuussinermut ataqatigiissarisoq Randi Broberg KNR.gl-mut ilisimatitsivoq.
Piitannguaq Alaufesen aamma Valerius Nielsen illoqarfinni allani aliikkusersuerusukkaluarput.
- Kisianni tassa suliffitta saniatigut piffissaqarnerput apeqqutaasaqigami. Illoqarfiit allat tikikkusuttorujussuugaluarpagut, Valerius Nielsen oqarpoq.
