Quiasaaraluni qaartartuuteqarnerartoq politiinit tigusarineqarpoq
Quiasaarigaluarpoq, politiilli tamanna quianartutut nalilinngivippaat.
Sermitsiap nittartagaani sermitsiaq.gl-imi tamanna atuarneqarsinnaavoq.
Quiasaarinerugaluartoq, timmisartoqarfimmi sulisut politiillu ilumoorullugit tiguaat.
- Ukiup affaata ingerlanerinnaani aappassaa taama misigisaqarpugut. Tamakku ullutsinni quiasaarutissaanngivipput, pingaartumik New Yorkimi septembarip ulluisa aqqarnanni saassussisoqareernerata kingorna, Aasianni politeeqarfimmi pisortaq, Gerth Jakobsen, oqarpoq, sioorasaarinermullu assersuuppaa soorlugooq inuit arlaat aallaaniarlugu sioorasaarlugu.
Angutip quiasaariaraluartup sioorasaarisimasutut unnerluunneqarnissani naatsorsuutigissavaa, immaqa aamma akiliisinneqarsinnaassaaq, tamannali eqqartuussivimmi aalajangerneqassaaq, Aasianni politeeqarfimmi pisortaq Sermitsiamit issuarneqarpoq.