Questip naalagaa pisuutinneqarpoq
Takornarianik angallassissutip Questip Qeqertarsuup eqqannguani siorna ikkarlinneranut umiarsuup naalagaa pisuutinneqarpoq, tamanna ajutoornermut nalunaarusiami saqqummiunneqaqqammersumi atuarneqarsinnaavoq, taama aviisi Sermitsiaq allaaserinnippoq.
Allattoq Najaaraq Egede
aggustip 19-at 2008 17:05
Umiarsuup takornariartaatip Quest-ip, siorna 2007-imi Qeqertarsuup eqqaani ikkarlittup naalagaa akisussaassuseqanngitsumik iliorsimasoq, ajortoornermut nalunaarusiaq inerniliivoq.
Danmarkimi Søfartsstyrelsi ajutoornermut nalunaarusiami ilaatigut allaaserineqarpoq, Questip naalagaata angalanermut pilersaarut unioqqutillugu sapinngisamik nunamut qaninniarluni ingerlaarsimasoq, ilaasut arfernik ilulissanillu takunninniassammata. Tamatuma saniatigut umiarsuaq ilulissat akornisigoornermini 9 knobinik (akunnermut 14,4 kilometerinik) sukkassuseqarsimavoq.
Umiarsuup naalagaa pisariaqanngitsumik navianartorsiortitsisimasutut pisimasorlu tunngaviusumik umiartornermut naapertuuttutut isigineqarsinnaanngitsoq, inerniliinermi nalilerneqarput.
