Quest Qeqertarsuup avatinnguani ikkarlippoq

Umiarsuaq takornariut MS Disko II Qeqertarsuarmi kuussuup avatinnguani ullaaq manna ikkarlippoq. Umiarsuarmut ilaasut manna nioorartinneqareerput, tinikkiartormallu umiarsuaq ueriartuaarpoq. Ikkarlinneq pillugu Politimestereqarfimmeersoq Bjørn Bay oqaluttuarpoq:

-Qeqertarsuarmi politiit ullaaq nalunaaqutaq arfineq-pingasunut qeqqalersoq sianerput oqaluttuarlutillu umiarsuaq Disko II-jusimasoq massakkulli Questimik ateqartoq, illoqarfimmit 200 meterit missaanni ungasitsigisumut pillunilu ikkarlissimasoq. Umiarsuaq ikkarlinnermi kingunerisaanik 30 gradit missaanni maanna uersimavoq, Bjørn Bay oqarpoq.

Ilaasunik ajoqusertoqanngilaq, sillimanissarlu pissutigalugu ilaasut nunaliaanneqareerput.

- Ilisimatinneqarpunga ilaasut tamarmik ajoratik manna nunamiittut taquassaanillu tunioqqarnereersimasut. Maannalu tinikkiartorpoq tinikkiartorneranilu umiarsuup uernerulersinnaanera nakkutigeqqissaarneqarpoq.

- Ullumi marloqeqqata missaani tinilluarpat qanoq pisoqarnissaa eqqoriarsinnaanngilarput, imaassinnaavoq umiarsuaq uerujussuartoq kinngulluniluunniit, kinngussagunilu uuliarluersinnaavoq, tamaattoqassappallu Avatangiisinut Pisortaqarfik saliinissamut akisussaasuusoq piareersimaqqullugu attavigereerparput, naak umiarsuup kinngunissaa ilimananngikkaluartoq, Bjørn Bay erseqqissaavoq.

Avatangiisinut Pisortaqarfiup saniatigut Kangilinnguani sakkutooqarfik Imarsiornermullu Aqutsisoqarfik politimestereqarfimmit aamma attavigineqarput.